01 июля 2015 г.
Пирĕн çĕршывра кашни çулах июнĕн 27-мĕшĕнче Çамрăксен кунне уявлаççĕ. Çак кун кашни регионта тĕрлĕ мероприятисем иртеççĕ. Чăваш Республикинчи районсемпе хуласем те ыттисенчен юлмаççĕ.
Ял çыннисем пурăнмалли условисене лайăхлатаççĕ
Хĕрлĕчутайсем те пултаруллă çамрăксене тупса палăртса май пур таран пулăшма тăрăшаççĕ. Çамрăксенчен нумайăшне хумхантаракан çивĕч ыйтусенчен пĕри вăл - хăйсене ятăн пурăнмалли кĕтес çукки. Çурт лартас е хваттер туянас тесен укçа сахал мар кирлĕ. Юрать-ха, юлашки çулсенче ку енĕпе патшалăх субсиди е социаллă тỹлев парса пулăшать.
Июнĕн 23-мĕшĕнче район администрацийĕнче федерацин "Ял территорийĕсен 2014-2017 çулсенчи тата 2020 çулчченхи тапхăрти тăнăçлă аталанăвĕ" тĕллевлĕ программипе килĕшỹллĕн ялта ĕçлесе пурăнакан çамрăк специалистсемпе граждансене пурăнмалли çурт-йĕр условийĕсене лайăхлатмашкăн социаллă тỹлев илмелли свидетельствăсене панă. Телейлисен йышне Николай Лисаев фермер хуçалăхĕнче ĕçлекен Юрий Тибогайкин механизатор, "Нива" ЯХПК-н сĕт-тавар фермин хуралçи Петр Данилов тата Дмитрий Галкин ветеринари врачĕ, "Коминтерн" ЯХПК бухгалтер-кассирĕ Наталия Егорова тата тĕрлĕ ĕç пурнăçлакан Петр Индейкин, "Свобода" хуçалăх рабочийĕ Ирина Ягодейкина, Туктамăш ялĕн библиотекарĕ Вера Терентьева кĕнĕ.
Нумай ачаллисене - республикăн амăшĕн капиталĕ
Çамрăксен кунĕ умĕн, июнĕн 26-мĕшĕнче, райадминистраци пуçлăхĕ Александр Башкиров районти çамрăк специалистсемпе тата çамрăк çемьесемпе тĕл пулчĕ. Уяв ячĕпе саламланă май Александр Викторович çамрăксем район пуласлăхĕ пулнине палăртрĕ, вĕсене малашне те район аталанăвĕшĕн тăрăшма чĕнсе каларĕ.