08 июля 2015 г.
2016 çулта çĕршывра Пĕтĕм Раççейри ялхуçалăх çыравĕ иртмелле. Юлашки хут вăл 2006 çулта пулнă. Унтанпа лару-тăру палăрмаллах улшăнчĕ. Агропромышленность комплексĕнчи ĕç-хĕле тĕплĕн пĕлмесĕр отрасле кирлĕ пек пулăшма йывăр. Çырав Чăваш Енре 2016 çулхи июлĕн 1-мĕшĕнчен пуçласа августăн 15-мĕшĕччен иртĕ. Çак кунсенче Правительство çуртĕнче ЧР Министрсен Кабинечĕн Председателĕ Иван Моторин ертсе пынипе Пĕтĕм Раççейри ялхуçалăх çыравне йĕркелесе ирттерессипе Правительство комиссийĕн пĕрремĕш ларăвĕ пулнă. Унăн ĕçне ЧР Министрсен Кабинечĕн Председатель çумĕ - ялхуçалăх министрĕ Сергей Павлов, Правительство комиссийĕн членĕсем, район-хула ертỹçисем, ял тăрăхĕ-сен специалисчĕсем хутшăннă. Çырав çĕр пурлăхне, унпа мĕнле усă курнине, ялхуçалăх культурисен лаптăкне, выльăх-чĕрлĕх, чăх-чĕп шутне, ялхуçалăх продукцине туса илсе сутнине тата ыттине туллин пĕлме май парать. Хальхи вăхăтра Чăваш Енре çырава хатĕрленсе ирттерессипе ĕçлеме тытăннă ĕнтĕ. Нормативпа право никĕсне, çыравра шута илмелли объектсене палăртаççĕ, список тăваççĕ. Кăçал хатĕрленỹ тапхăрĕн малтанхи ĕçне вĕçлемелле.
Источник: "Пирěн пурнăç"