10 июля 2015 г.
Юлашки çулсенче пирĕн районта та фермерсен хуçалăхĕсем йĕркеленсе, вăй илсе пыраççĕ. Вĕсен шучĕ çултан-çул хушăнса пырать. Аса илер-ха, кăçал çуркунне районти сакăр çын грант илме ялхуçалăх министерствине документсем тăратнăччĕ. Анчах конкурсра çĕнтерме пĕрре те çăмăл мар, конкурс условийĕсем питĕ çирĕп, çавăнпах пулĕ вĕсенчен пĕри те гранта тивĕçеймен. Акă нумаях пулмасть министерство иккĕмĕш хут конкурс ирттернĕ. Ку хутĕнче комисси "Ĕçе тытăнакан фермер" программăпа килĕшỹллĕн Тралькасси ял тăрăхĕнчи Карăкçырми ялĕнчи Алексей Ермаковăн бизнес-планне ырласа 1 миллион та 100 пине яхăн тенкĕ пама йышăннă. Хресченпе фермер хуçалăхне нумаях пулмасть йĕркеленĕ 30 çулхи Алексей Ермаков çав укçа куçса çитсенех 10 пушмак пăру тата утă çулмалли хатĕр туянма ĕмĕтленет. Сăмах май, вăл кăçал 0,5 гектар лаптăк çĕр çинче çĕрулми лартса хăварнă. Ăнăçлă ĕçлеме унăн вăй-хăвачĕ те, кăмăлĕ те туллиех. Çамрăк çын ытти яш-кĕрĕмпе хуланалла çул тытманни, ялта юлса выльăх-чĕрлĕх усрама шутлани, паллах, кăмăллă. Кун пек пулсан ялăн пуласлăхĕ пурри куçкĕрет, ламран лама куçса пынă хресчен ĕçĕ çухалмасть. Алексей пек пуçаруллă, ĕçчен, мал ĕмĕтлĕ яш-кĕрĕме район администрацийĕн пуçлăхĕ те мухтать, шăпах çамрăксем фермер ĕçне аталантарса пырас тĕлĕшре пысăк вăй пуласса шанать.
А.ЗАМУТКИНА.
Источник: "Пирěн пурнăç"