10 июля 2015 г.
Кăçал Раççейри çỹп-çап куписем йышăнакан лаптăксен калăпăшĕ Швейцари территорийĕ чухлĕ пулса кайнă, пĕлтерет Россельхознадзор, çакă 4 миллиона яхăн гектарпа танлашать. Чи хăрушши, çулсерен 90 млрд. тонна яхăн çỹп-çап пухăнать, çитменнине хушăнсах пырать вăл. Çĕр-шывра саккунлă пин полигон кăна, санкцилеменнисем вара 30 хут нумайрах. Ялхуçалăх пĕлтерĕшлĕ çĕрсем çинче те сахал мар вĕсен шучĕ. 2014 çулта Россельхознадзор инспекторĕсем Раççейĕпе 3,2 пин çỹп-çап купи тупса палăртнă, ку вара 4 пин гектар ытла япăхланнă çĕр. Специалистсем каланă тăрăх, çакă вырăнти хăйтытăмлăх органĕсем ĕçлесе çитерейменнипе те çыхăннă. Муниципалитетсем хăйсен территорийĕнчен кирлĕ мар япаласене ятарлă вырăна кайса тăкма васкамаççĕ. Вĕсене ăçта та пулса пăрахмаллах, çапла çỹп-çап ялхуçалăх пĕлтерĕшлĕ çĕр çине лекет те. Асăннă ведомство пĕр çĕрте темиçе çулхи купасемпе "кĕрешнĕ" вăхăтра тепĕр çĕрте урăххи ỹссе те ларать. Инспекторсен куçĕ тĕлне пулнă кашни купа айĕнчи çĕр хăйĕн пахалăхне çухатнă. Çакна лаборатори тĕпчевĕсен пĕтĕмлетĕвĕсем çирĕплетеççĕ. Тăпрара йывăр металсем, канцерогенсем тата сиенлĕ бактерисем тупăнаççĕ. Чăннипе, çакнашкал лаптăкри çĕрĕн пулăхлăхне тавăрма май çукпа пĕрех. Редакцинчен: Чăнах та, çỹп-çапланса кайрăмăр. Районта кашни ял хыçĕнчех çỹп-çап куписене курма пулать. Ял тăрăхĕсен администрацийĕсем пуçтаркалаççĕ-ха, анчах та ял халăхĕ хыççăн пуçтарса çитерме йывăртарах. Ăçта кирлĕ çавăнта тухса пăрахни вара самаях тавралăха киревсĕрлентерет. Çул хĕрне, асфальт çул варрине, анкарти вĕçне, урама тухса тăкнине вара ăнланмалла мар. Çав çỹп-çап кама валли-ши?!
Н.ВАСИЛЬЕВА, Россельхознадзорăн республикăри управленийĕн ĕçченĕ.
Источник: "Пирěн пурнăç"