15 июля 2015 г.
Кăçалхи март-май уйăхĕсенче онлайн мелĕпе Пĕтĕм Раççейри "Раççей ачисем - миршĕн" патриотла акци иртнĕ. Конкурс сайтне Раççейĕн тĕрлĕ субъектĕнчи кĕçĕн классенче ăс пухакан ачасемпе ача сачĕсене çỹрекен пепкесен пĕтĕмпе 18 пине яхăн сăнỹкерчĕкĕ килнĕ. Федерацин Атăлçи округĕ уйрăмах хастар пулнă. Малти ретре - Пушкăрт, Чăваш, Мордва республикисем. Палăртмалла, кашни регионтах сасăлав мелĕпе чи нумай сасă пухнă сăнỹкерчĕксене суйланă. Чăваш Енре призер шутне шкул çулне çитмен 12 ача кĕнĕ. Вĕсем хушшинче пирĕн районти Туктамăш ялĕнче пурăнакан, çитес кĕркунне 4 çул тултаракан Вадим Рыжов та пурри савăнтарать. Акци çĕнтерỹçисене июлĕн 8-мĕшĕнче Шупашкарти 5 № гимназире республика Пуçлăхĕн тивĕçĕсене вăхăтлăх пурнăçлакан Михаил Игнатьев сертификат тата парне парса чысланă. Асăннă мероприятие чылай сумлă хăна хутшăннă, вĕсен йышĕнче - РФ Федераллă Пухăвĕн Патшалăх Думин вĕренỹ енĕпе ĕçлекен Комитечĕн председатель çумĕ, "Единая Россия" партин Аслă Канашĕн Президиум членĕ Алена Аршинова. Çĕнтерỹçĕ йышне кĕнĕ Вадимăн амăшĕпе, Эмма Рыжовапа, тĕл пулса калаçрăмăр, чыславра пулнă хыççăнхи кăмăл-шухăшĕпе паллаштарма ыйтрăмăр. - Асăннă акцие хутшăнса мала тухнăшăн чи малтанах ывăлăмăн воспитателĕ, "Хĕвел" ача садĕнче тимлекен Юлия Геннадьевна Матвеева, ырă сăмаха тивĕç. Вăл сĕннипе эпир кĕçĕн ывăлăмпа "Çĕнтерỹ" ятлă сăнỹкерчĕк хатĕрлерĕмĕр. Сăнỹкерчĕк хатĕрленипех ĕç вĕçленмерĕ-ха. Юлия Геннадьевна хăех пирĕн ỹкерчĕке конкурс сайтне ярса пачĕ, регистраци турĕ. Малалла вара онлайн режимпа сасăлав тумаллаччĕ. Сасăлавра эпир пурĕ 134 сас пухма пултартăмăр, ку республикăри кăтартусенчен лайăххисенчен пĕри. Куншăн хăйсен сассине шеллемен пур çынна та тав сăмахĕ калатăп. Хĕрлĕ Чутай шкулĕнче 9-мĕш класра вĕреннĕ хĕрсемпе каччăсене вара уйрăммăн палăртса хăварас килет. Вĕсем пулăшма ыйтсан хирĕçлемерĕç, сасăлава хастар хутшăнчĕç. 12 çĕнтерỹçĕрен чылайăшĕ - хулари ачасем. Эпир те вĕсемпе тан малтисен ретне кĕме пултарнишĕн чунтанах савăнатăп. "Раççей ачисем - миршĕн" акци çĕнтерỹçисене чысласси "çавра сĕтел" хушшинче иртрĕ. Мана та, Вадим ывăлăма та кунти ăшпиллĕх кăмăла кайрĕ. Ачасен ашшĕ-амăшĕ сумлă хăнасене тĕрлĕ ыйту пама пултарчĕ, арçыначасемпе хĕрачасем пылак апат-çимĕçпе сăйланчĕç. Каярахпа Алена Аршинова пурне те сертификат пачĕ, Михаил Игнатьев "Единая Россия" партин паллине _ шурă упа çурине - парнелерĕ. Унпа пĕрлех ачасене ỹкермелли хатĕр-сем тата "Акконд" фабрикăн канфечĕсене пачĕç. Ачасене савăнмалăх нумай кирлĕ-и? Шăпăрлансен куçĕсем савăнăçпа, телейпе çиçнине курма вара çав тери кăмăллă пулчĕ. Чыславран тулли кăмăлпа таврăннине пытармастăп. Мана та, ывăлăма та ку мероприяти питĕ килĕшрĕ, малалла та тĕрлĕ конкурссене хутшăнма хавхалану кỹчĕ. Автортан: кĕçĕн хĕрĕмпе пĕрле выляса ỹсекен Вадимăн сăнỹкерчĕкĕшĕн хам та çемьепе темиçе сас панă май, унăн çĕнтерĕвне пĕчĕк те пулин тỹпе хывнăшăн савăнатăп. Малашне те Вадима кун евĕр конкурссене хастар хутшăнса тата çĕнĕ çитĕнỹсем тума ăнăçу сунатăп. Н.МИДАКОВА.
Источник: "Пирěн пурнăç"