17 июля 2015 г.
Татьяна МИНИНА, Чăваш Республикин Тĕрĕслевпе шутлав палатин председателĕ:
- Июлĕн 15-мĕшĕнче районта Пĕрлехи информаци кунĕ иртрĕ. Яланхи пекех ку хутĕнче те Пĕрлехи информаци кунĕн темисем паянхи куншăн çивĕч пулчĕç, çав шутра 2015 çулхи июлĕн 1-мĕшĕнчен коммуналлă пулăшусемшĕн тарифсем улшăнни те, пушар хăрушсăрлăх мерисем тата шыв объекчĕсем çинче çынсен хăрушсăрлăхне тивĕçтересси те, сывлăха тата пурлăха страхлама сĕнỹ парасси те, выльăх апатне хатĕрлес ĕç епле пыни те. Информаци кунĕ тухăçлă иртрĕ. Тĕл- пулусенче çынсем ытларах вырăнти пĕлтерĕшлĕ ыйтусем пачĕç, чылай хуравне вырăнтах илме пултарчĕç. Эпĕ ертсе пыракан ушкăн район больницин ĕçченĕсемпе тĕлпулчĕ. Вĕсене те, районти ытти çынсемпе танах, ытларах çул-йĕр тата умри суйлав ыйтăвĕсем пăшăрхантарни палăрчĕ. Çавăн пекех хĕрлĕчутайсем автовокзал çывăхĕнче тĕттĕмлĕх хуçаланнине те пĕлтерчĕç. Çакăн йышши ыйтусене халăхăн власть çыннисем патне çитермеллех, эпир вара хамăр енчен пулăшма тăрăшăпăр. Паллах, район центрĕнче тĕттĕм кĕтессем пулмалла мар. Палăртрăм ĕнтĕ, хĕрлĕчутайсем сентябрĕн 13-мĕшĕнче иртекен суйлав тавра та нумай ыйтусем параççĕ -ун чухне камсене суйламалла, мĕншĕн район администрацийĕн тата ял тăрăхĕн пуçлăхĕсене суйламастпăр тесе ыйтаççĕ. Тĕрĕс ыйтаççĕ, кирлĕ ыйту. Асăннă ыйтусен хуравне хаçат страницисенче палăртсан халăха юрăхлă кăна пулмалла.
Источник: "Пирěн пурнăç"