17 июля 2015 г.
Суту-илỹре ĕçлеме чăтăмлă, ĕçчен, вашават çын кирлĕ теççĕ. Кунта çынсемпе йăваш калаçма, итлеме пĕлни пĕлтерĕшлĕ. Ара, çакăнтан тавар епле каясси те, коллективри ĕç-хĕл юхăмĕ те килет. Хĕрлĕ Чутай салин Кивĕ центрĕнчи райпон пулăсем тăварласа тĕтĕмлекен цехĕнче ĕçлекен Сергей Ешмейкин шăпах çавăн йышши çын. 40-рен каçнă, Атнарта çуралнă, халĕ Урикассинче пурăнаканскер, 10-мĕш класс хыççăн Вăрнарти совхозтехникумра зоотехника вĕренсе тухнă. Хыççăн тăван колхозра темиçе çул уй-хир бригадирĕнче, тĕрлĕ ĕçсенче вăй хунă. Райпо тытăмĕнче 1996 çултанпа тăрăшать. Малтанах виçĕ çул Трапай лавккинче сутуçăра ĕçленĕ. Унтан пулă тăварласа тĕтĕмлемелли цеха килсе вырнаçнă. Тутлă пулă тăварлас, тĕтĕмлес ĕç вăрттăнлăхĕсене чылай хушши пĕрле ĕçленĕ Анатолий Зверевран хăнăхса юлнă. Çак цехран тухнă пулăна районта кăмăлпах туянаççĕ, юратсах çиеççĕ. Çавăнпа продукци хăйĕн вырăнне тупнă теме пулать тата цехăн кăтартăвĕсем те лайăх. Иртнĕ çул акă Сергей хăйĕн ĕçтешĕпе 26,4 тонна продукци туса кăларнă, укçа çине куçарсан 2 миллион та 785 пин тенкĕлĕх. Планра палăртнине тултарса пырать пĕчĕк коллектив. Сергей Николаевич çак ĕçре 16 çула яхăн тимлет. "Хăнăхнă ĕçрен ниçта та каяс килмест", _ тет вăл. Çак хушăра унăн ĕçне темиçе хут та хакланине те асăнчĕ вăл. Пулă тăварлакан, тĕтĕмлекен ăста Чăвашпотребсоюзăн Хисеп хутне кăна мар, Центросоюзăн Хисеп грамотине те тивĕçнĕ иккен. Кăçал вара вăл Акатуй вăхăтĕнче нумай çул тỹрĕ кăмăлпа ĕçленĕшĕн тепĕр хут Чăвашпотребсоюзăн грамотине илме тивĕçлĕ пулчĕ. Ĕçне чăннипех яваплăха туйса туллин пурнăçлать вăл.
Альбина ЗАМУТКИНА.
Источник: "Пирěн пурнăç"