29 июля 2015 г.
Суйлав кунĕ çывхарса пырать. Июлĕн 27-мĕшĕ тĕлне территорири суйлав комиссийĕ вырăнти хăйтытăмлăх органĕсен депутачĕ пулма хăй тĕллĕн докуменчĕсене тăратнă 9 кандидата регистрациленĕ. Партисен тĕлĕшĕнчен илсен, "Единая Россия" политика партийĕн вырăнти уйрăмĕ кандидатсен списокне пырса панă. Кăçалхи июлĕн 26-мĕшĕнче территорири суйлав комиссийĕ район Пухăвĕн депутачĕ пулма 18 кандидат, ял тăрăхĕсен пухăвĕсен депутачĕ пуласшăн 115 кандидат çинчен калакан списоксене пăхса тухса пĕр шухăшлă пулса йышăну кăларнă. Хальхи вăхăтра кандидатсенчен документсем пухас тапхăр пырать. Çавăн пекех июлĕн 27-мĕшĕнче Раççейри коммунистсен вырăнти партийĕн ертỹçи депутат пулас шухăшлисен списокне килсе панă. Район Пухăвĕн депутачĕ пулма 9-ăн килĕшнĕ, ял тăрăхĕн депутачĕ пулма 21-ен кăмăл тунă. "Справедливая Россия" политика партийĕн районти вырăнти уйрăмĕнчен те список илсе килсе панă. Список тăрăх, 2 кандидат район Пухăвĕн депутачĕ пулма, пĕр кандидат ял тăрăхĕн депутачĕ пулма кăмăл туса хăйсен ячĕсене списока кĕрттернĕ. Списоксене йышăнсан, виçĕ кунтан, тĕрĕслев ĕçĕсем ирттернĕ хыççăн территорири суйлав комиссийĕ йышăну кăларать. Унтан документсем килсе парас ĕç пуçланать. Аса илтеретпĕр, ку тапхăр вĕçлениччен 6 кун кăна юлчĕ.
Территорири суйлав комиссийĕ.
Источник: "Пирěн пурнăç"