05 августа 2015 г.
Райпо тытăмне кĕрекен "Заготовки" пĕрлешĕве нумайăшĕ "хатĕрлев кантурĕ" ятпа пĕлет. Ячĕ кăна улшăннă унăн, ĕç-хĕлĕ вара çаплипех юлнă. Пысăках мар коллектива Евгений Соловьев ертсе пырать. Тĕпрен илсен пĕрлешỹ ял халăхĕн ыйтăвĕсене тивĕçтерес енĕпе вăй хурать, унпа пĕрлех райпо аталанăвне тỹпе хывать. Акă кулленех кунтан виçĕ ГАЗ автомашина тата виçĕ УАЗ машина ялсем тăрăх сĕт пуçтарма тухса каяççĕ. Вĕсене районти 1400 çын сĕт тата ытти хăй туса илнĕ продукцие парать. Асăннă пĕрлешỹ çавăн пекех халăхран выльăх-чĕрлĕх, тир, эмел курăкĕ, макулатура, кĕленче таврашне тата ыттине те пухать. Кăçалхи январь-июнь уйăхĕсенче пĕрлешỹ 278,5 центнер аш-какай, 21227 центнер сĕт, 70 штук тир, 97 центнер макулатура, 7 центнер эмел курăкĕ пухнă. Сăмах май, çулла - эмел курăкĕ пухмалли вăхăт. Ку ĕçе уйрăмах шкул ачисем хаваспах хутшăнаççĕ. Вĕсене эмел курăкĕ пухтарас ĕçе явăçтарас тĕллевпе июнь уйăхĕнче "хатĕрлев кантурĕ" районти ĕçпе тивĕçтерекен центрпа тата шкулсемпе пĕрле тĕлпулу та йĕркеленĕччĕ. "Заготовки" пĕрлешỹ ял çыннисен продукцине вырнаçтарса панисĕр пуçне хăй те вĕсене ял хуçалăхĕн-че кирлĕ таварсемпе тивĕçтерме тăрăшать. Кăçалхи пĕрремĕш çур çулта райпо халăха 79 тонна тыр-пул фуражĕ, 100 тонна отрубь, 1549 чăх-чĕп, 10 тонна удобрени тата 3,8 тонна çĕрулми, 4,6 тонна нумай çул ỹсекен курăк, 2 тонна сухан вăрлăхĕсене сутнă. Кирлĕ таварсене ял çыннисем райпо лавккисенче туянма пултараççĕ е заявка тăрăх вырăнах çитерсе параççĕ. Çакă ял çыннишĕн питĕ меллĕ. "Заготовки" тулли мар яваплă обществăна çитсе кĕрсен кунта хăйне евĕр пурнăç вĕресе тăнине туйса илетĕн. Хальхи вăхăтра эмел курăкĕ пама килеççĕ, ытларах ачасем. Вĕсенчен кашниех канмалли кунсене усăллă ирттерме тăрăшни сисĕнет. Марина Гусева склад заведующийĕ ачасене хăш курăка хăçан пухмаллине, мĕнле типĕт-меллине ăнлантарса парать, хакĕсемпе паллаштарать, кам пухса килнĕ _ йышăнса юлать. Юнашар тырă склачĕ тата тыр-пул вĕтетмелли цех. Кунта Галина Савинкинапа Геннадий Сыров тырă авăртаççĕ. КД-2 арман сехетре икĕ тонна тыр-пул вĕтетсе кăларать. Выльăх-чĕрлĕх валли хатĕр отрубе заявка тăрăх лавккасене леçеççĕ е çынсене килне çитерсе параççĕ. Халăха тыр-пула килограмне - 11 тенкĕпе, авăртнине вара 80 пус хушса сутаççĕ. Калас пулать, "хатĕрлев кантурĕ" чĕртавара вырнаçтарас енĕпе чылай фабрикăпа тата фирмăпа лайăх ĕçлĕ çыхăнусем йĕркеленĕ. Çакă ялхуçалăх продукцине тата эмелпе техника чĕртаварне вăхăтра тата меллĕ вырнаçтарма май парать.
А.ДМИТРИЕВА.
Источник: "Пирěн пурнăç"