05 августа 2015 г.
Июль уйăхĕн вĕçĕнче Чулхула облаçĕнчи Богородск районĕнчи Сартаково салинче фольклор юррисен "Хрусталь çăлкуç" фестиваль-конкурсĕ иртнĕ. Унта 20 пине яхăн хăна пулнă. Фестивальте Удмурт, Мари Эл, Пушкăрт, Чăваш, Тутар республикисенчи тата нумай облаçри 40 ытла фольклор ушкăнĕ хутшăннă. Сорăм ялĕнче ỹссе çитĕннĕ пирĕн ентеш Земфира Яковлева ертсе пыракан Шупашкар районĕнчи Çĕньялти пултарулăх çурчĕн "Çĕньял" фольклор ансамблĕ фестивальте пĕрремĕш степеньлĕ Диплома тивĕçнĕ. Ку фестивале ансамбль лайăх хатĕрленнĕ, пĕрремĕш кунĕнче вăл жюри умне Атăл юханшывне халалланă икĕ юрăпа тата ташăпа тухнă. "Çĕньял" ансамбль репертуарĕн-че ахаль чăваш юррисем кăна мар, пирĕн районта тата Етĕрне районĕнче çырса илнĕ ĕлĕк-авалхи юрăсем. Кăçал çак ансамбль йĕркеленнĕренпе 27 çул çитнĕ. Сăмах май, асăннă фольклор ансамблĕ кăçал Земфира Кузьминична Яковлева ертсе килнипе Сорăм ял уявĕнче те халăха юрă-ташăпа савăнтарнăччĕ. А.ЗАМУТКИНА.
Источник: "Пирěн пурнăç"