07 августа 2015 г.
Инженер-строитель. Ку профессипе ĕçлекенĕн тĕп пахалăхĕ-сем - çивĕч ăс-тăн тата тимлĕх. Çак енсем тĕрлĕ çурт-йĕр, объектсем вăхăтра тата пахалăхлă хута ярас ĕçре питĕ кирлĕ. Унсăрăн хăтлă та илемлĕ çурт-йĕр те пулаймĕ. Ку çăмăл мар, çав хушăрах яваплă профессие ытларах арçынсем суйласа илеççĕ. Анчах та сайра хутра хĕрарăмсем те тĕл пулаççĕ. Вĕсенчен пĕри - район администрацийĕн обществăлла инфратытăм аталанăвĕн тата коммуналлă хуçалăхпа çурт-йĕр, çул-йĕр хуçалăх пайĕн тĕп специалистĕнче ĕçленĕ, Мучикассинче пурăнакан Римма Сергеевна Ерофеева. Ишеккассинче 1963 çулта çуралнă вăл. 1987 çулта Чăваш патшалăх университетĕнчен вĕренсе тухнă. 30 çула яхăн Римма Сергеевна инженер-строитель пулса тĕрлĕ çĕрте ĕçленĕ. Çапах та ĕç кун-çулĕн ытларах пайĕ унăн "Чăвашагропроект" предприятипе тата район администрацийĕпе çыхăннă. Район территорийĕнче юлашки çулсенче чылай социаллă объект хута кайрĕ. Кивĕ центрта та строительсем çу каçипех 160 ача вырнаçмалăх икĕ хутлă ача сачĕн çуртне çĕклеççĕ. Çавăнта, паллах, Римма Сергеевнăн тỹпи те пур. Вăл ача сачĕн проект документацийĕпе нумай ĕçленĕ. Тăрăшулăхне кура кăçалхи Акатуй уявĕнче Римма Ерофеевана строительство отраслĕнче нумай çул тỹрĕ кăмăлпа ĕçленĕшĕн Чăваш Республикин Строительство министерствин Хисеп грамотине парса чысларĕç. Икĕ çул маларах вăл, 50 çулхи юбилей ячĕпе, район администрацийĕн пуçлăхĕн Хисеп грамотине те илме тивĕçнĕччĕ.
А.ДМИТРИЕВА.
Источник: "Пирěн пурнăç"