07 августа 2015 г.
Марина Пандакова пирки районта илтмен çын çук пуль. Кăнтăр Корейăра иртнĕ Пĕтĕм тĕнчери Универсиадăра вăл Раççей, Чăваш Ен ятне чыслă хỹтĕлерĕ. Спортсменка çĕршывăн пĕрлештернĕ командипе пĕрле ылтăн медале тивĕçрĕ, спорт уттипе 20 километра парăнтарса кĕмĕл медаль çĕнсе илчĕ. Паллă спортсменкăн, тĕнчери класлă Раççей спорт мастерĕн Маринăн ашшĕпе амăшĕ Çĕн Атикасси ялĕнче пурăнаççĕ. Çавăнпах вăл пирĕн района та чапа кăларчĕ тесен те тĕрĕс. Июлĕн 25-мĕшĕнче, Çĕн Атикасси ял уя- вĕнче, унăн ашшĕпе амăшĕ, Нинăпа Александр Пандаковсем, пултаруллă хĕр çуратса ỹстернĕшĕн район администрацийĕн Тав сăмахне тивĕçрĕç.
ЧР Министрсен Кабинечĕн Председателĕ Иван Моторин июлĕн 31-мĕшĕнче 467-р номерлĕ йышăну кăларнă. "Чăваш Республикинчи тренерсене тата спортсменсене патшалăх пулăшăвĕ парасси çинчен" йышăнупа килĕшỹллĕн Марина Пандакована республика умĕнчи тава тивĕçлĕ ĕçсемшĕн пĕр хут паракан преми тата спортри пысăк çитĕнỹшĕн уйăхсерен укçа тỹлесе тăрĕç. Çапла вара республикăри Олимп резервĕн 8-мĕш номерлĕ спорт шкулĕн спортсменки 60 пин тенкĕне тивĕçĕ, унсăр пуçне кашни уйăхра кăçалхи август уйăхĕнчен пуçласа çулталăк хушши 7500 тенкĕ илсе тăрĕ.
А.ЗАМУТКИНА.
Источник: "Пирěн пурнăç"