07 августа 2015 г.
Августăн 6-мĕшĕ тĕлне хĕрлĕчутайсем 530 гектар çинчен пĕрчĕллĕ тата пăрçа йышши культурăсене 1055 тонна, вăл шутра 1025 тонна тулă, 30 тонна урпа пухса кĕртнĕ. Тухăçĕ вăтамран - гектар пуçне 19,9 центнер. "Коминтерн" хуçалăхĕн хир карапĕсем çак эрнере Ачкасси ялĕ çывăхĕнче тара илнĕ çĕрсем çинче тритикале (ыраш тата тулă гибричĕ) выратчĕç. Унта пырса çитсенех сăмахпа çырса пама çук илемлĕ, таса, сап-сарă уй куçа илĕртрĕ. Тулли пучахсем пиçсе çитнĕ, часах пỹлмене кĕме хатĕрленнĕ тейĕн, пуçĕсене йывăррăн усса лараççĕ. "Агросс 530" тата "Дон 1500" комбайнсем сарă тинĕс тăрăх пĕрин хыççăн тепри шăватчĕç. КамАЗ тата ГАЗ йышши автомашинăсем тĕштырăна механизациленĕ йĕтем çине турттарса тăраççĕ. Вырма ĕçĕ кал-кал пулса пынине курса такамăн та чун хĕпĕртемелле. Атнарсем 215 гектар çинчи тыр-пула пухса кĕртнĕ, 400 тонна тĕштырă çапса илнĕ. Çулçỹрев кунтан тỹрех Утаркассине выртрĕ. "Авангард" ТЯО-ри ỹкерчĕк кăмăла хуçрĕ. Ĕç çыннисен пĕр ушкăнĕ ĕçсĕр аптăраса ларатчĕ. Урамра хĕвел пăхать пулин те, икĕ комбайнĕ те вырăнтан та тапранаймасть. Пĕрин саппас пайĕ таçтан килсе çитеймен, тепринпе Эдуард Горланов комбайнер хăш-пĕр пайсене лартса хытарсанах хире тухма шантарчĕ. Вăл ытларикун пĕрремĕш хут вырмана тухнă-мĕн, анчах 25 çула яхăн ĕçлекен "Нива" хир карапĕ темĕнле пăхсан та пĕрмай чăхăмлать иккен. Николай Лисаев фермерăн уй-хирĕ вара кунран-кун пушанса пыни куç умĕнчех. Ĕç чăннипех вĕрет: йĕтем çинче те, уйра та. Фермерăн тыр-пул тухăçĕ районăн вăтам кăтартă- вĕнчен те пысăк, 23,3 центнерпа танлашать. Кăçал тыр-пул ытти çулхисемпе танлаштарсан чылай çĕрте начартарах ỹснине кура, ку хуçалăхăн ăнса пулнă тĕштыррине кỹршĕ республикăран килсе илсе каяççĕ иккен. А.ЗАМУТКИНА.
ФОТОРЕПОРТАЖ
Источник: "Пирěн пурнăç"