12 августа 2015 г.
Август уйăхĕн пуçламăшĕнче Николай Лисаев фермерăн техника паркĕ çĕнĕ "Агромаш 3000" комбайнпа тата 400 пин тенкĕ тăракан пресс-подборщикпа пуянланчĕ. Çавăнпа кăçалхи вырма ĕçĕсем кунта ăнăçлă иртесси никама та иккĕлентермест. Пĕрчĕллĕ, пăрçа, кĕрпе йышши культурăсене, хĕвелçаврăнăшне, курăк вăррисене, сойăна пуçтарса илме пултаракан комбайн 3 миллион та 200 пин тенкĕ тăрать. Çавăн пекех ку техникăшăн вăтам тата пысăк тухăç паракан, йывăррăн вырăнакан культурăсемлĕ, вăтам е пысăк нỹрĕклĕ уйсем те нимĕн те мар иккен. "Агромаш 3000" комбайнăн двигатель хăвачĕ 185 лаша вăйĕпе танлашать, пĕр сехетре 9-11 тонна вырма пултарать. Бункера 5 тонна тĕштырă вырнаçать. Çĕнĕ комбайна Владимир Кальматкина шанса панă. Опытлă механизатор çĕнĕ хир карапĕпе тырă вырма тухни эрне иртрĕ ĕнтĕ.
Районти ялхуçалăх предприятийĕсем августăн 11-мĕшĕ тĕлне пĕрчĕллĕ тата пăрçа йышши культурăсене 1159 гектар çинчен çулса тирпейленĕ. 2395 тонна тĕштырă çапса тĕшĕленĕ. Тыр-пул тухăçĕ гектар пуçне вăтамран 21,2 центнерпа танлашать. Хуçалăхсем хушшинче тырă вырассипе чи малта "Коминтерн" ЯХПК пырать: 451 гектара вырса тирпейленĕ, 920 тонна тĕштырă çапса тĕшĕленĕ. "Нива" - иккĕмĕш, кĕрхи тулăна 295 гектар çинчен 645 тонна пухса илнĕ. Виççĕмĕш вырăнта _ Н.Лисаев фермер хуçалăхĕ. Кунта 230 гектартан 550 тонна тĕштырă çапса кĕртнĕ.
А.ЗАМУТКИНА.
Источник: "Пирěн пурнăç"