14 августа 2015 г.
Пурăннă чух эпир пурте кăштах та пулин строительсем. Мĕншĕн тесен пирĕн хушăра пăта-мăлатук, мастерок е киçтĕк тата ытти хатĕр тытса курман, кил-çуртри юсав ĕçне хутшăнман çын çук-тăр. Анчах çурт-йĕр купаласси пуринчен те пулмасть, çакна чăн-чăн ăстасене кăна шанатпăр. Районăн Кивĕ центрĕнче çак çуллахи кунсенче тĕрлĕ тĕслĕ кирпĕчрен купаланă икĕ хутлă çурт хăпарса ларчĕ. Ку вăл - 160 ача валли ача сачĕ пулĕ. Строительствăна "Волга-Ресурс" ТЯО подряд организацийĕ (генеральнăй директорĕ Сергей Алексеев) пурнăçлать.
Палăртма кăмăллă, çак çурт калăпăшĕпе те пысăк, капмар пуласси никĕсĕнченех паллăччĕ. Анчах районти строительсен 12 кирпĕч хураканран та-та 4 пулăшаканран тăракан бригади пĕр шикленмесĕр ĕçе тытăнчĕ те икĕ уйăх хушшинче ăна хăпартса та лартрĕ. Шăрăх-и, çумăр-и _ строительсем ĕçе тивĕçлĕ пурнăçлаççĕ. Бригадăна Калкасси ялĕнче çуралнă Юрий Анатольевич Оринов пултаруллă çамрăк ертсе пырать. Каменщик профессине вăл Çĕмĕрлери профтехучилищĕре вĕреннĕ. Ĕçлемесĕр çăкăр çиме çуккине ачаранах туйса çитĕннĕскер, хăй те темиçе çул каялла Енкĕлт çывăхĕнче капмар та хăтлă çурт лартса йăва çавăрчĕ.
Юрăн мăшăрĕ, Наталья, Хĕрлĕ Чутай салинчи "Центральное" кафере ĕçлет. Ориновсем Дима ятлă ывăл ача ỹстереççĕ. Вăл та ашшĕ-амăшĕ пекех маттур, анчах унăн пултарулăхĕ хальлĕхе стройкăра мар, вĕренỹре тата сцена çинче палăрать. Кĕçĕн класра вĕренекен ачан таланчĕ ашшĕ-амăшне хăйсен профессийĕпе тăрăшса ĕçлеме хавхалантарса, вăй-хăват парса тăрать.
"Алли ылтăн, кăмăлĕ ырă", _ теççĕ ĕçтешĕсем 36 çулхи Юрий пирки хисеплесе. "Бригадир дисциплина енчен çирĕп", _ хушса каларĕ хăшĕ-пĕри. Тĕрĕсех ĕнтĕ, строительствăри ку чухнехи материалсемпе тата технологисемпе усă курни строительсен умне пысăк требованисем кăларса тăратать. Çавăнпа çак професси çыннисене пысăк пĕлỹ, яваплăха туйни, кулленхи ĕçре хăнăху кирлĕ. Çак пахалăхсене бригада ĕçченĕсем 10 çул ытла стройкăра ĕçлесе туптанă та ĕнтĕ. Строительсем çак социаллă пĕлтерĕшлĕ объекта - ача садне - тăван район ырлăхĕшĕн уйрăмах пысăк хавхаланупа тăрăшса пурнăçланине палăртрĕç.
Сăмах май, Строительсен професси уявĕ ячĕпе Юрий Оринов район администрацийĕн Тав сăмахне тивĕçрĕ. С.МИХАЙЛОВА.
Источник: "Пирěн пурнăç"