21 августа 2015 г.
Кăçалхи çурхи призыв вăхăтĕнче Тĕп çар округĕ Чăваш Енрен 1771 çамрăка çара илме хушнă. Çỹлтен каланине пирĕннисем пурнăçланă. Çара ăсатнисен шучĕпе яланхиллех Шупашкар (487 çын) тата Çĕнĕ Шупашкар (114) хулисем, Патăрьел (116), Канаш (81) районĕсем палăраççĕ. Пирĕн районтан иртнĕ çул çуркунне 36 çамрăк, кăçал 53 яш çар ретне тăнă.
Хĕсметрен тарса çỹрекенсем юлашки çулсенче сахалланса пынине палăртаççĕ. Призыв комиссине 6422 çынна чĕннĕ пулсан 99,6 проценчĕ унта пынă. Пăрăнса çỹрекенсем 2012 çулта 3508 çын шутланнă, 2013 çулта - 2690, кăçалхи çурхи призыв вăхăтĕнче - 1975. Çара каяссинчен пăрăнса çỹрекен 251 çамрăка шыраса тупнă. 40-шне административлă явап тыттарнă, 17-шĕ тĕлĕшпе уголовлă ĕç пуçарма ярса панă. Телее, çак йышра хĕрлĕчутайсем çук.