21 августа 2015 г.
Район администрацийĕн опекăпа попечительство секторĕ кăçалхи çур çулта аслисен тимлĕхĕсĕр тăрса юлнă виçĕ ачана шута илнĕ, иккĕшне çемьене опекăна панă, теприне интернат учрежденине янă. Июлĕн 1-мĕшĕ тĕлне çемьесенче 132 ача, вĕсенчен 13-шĕ сĕм тăлăх ачасем, шутланнă. 52 усрав çемьере 77 ача çитĕнет, 38 опекун çемйинче 55-ĕн пурăнаççĕ тата 10 çемьере - 11 ача хăйсен ирĕкĕпе опекăра.
Палăртмалла, районти 10 çемье каникул вăхăтĕнче хăйсен килĕсене тĕрлĕ интернат учрежденийĕсенчен 25 ачана илсе килнĕ.
Кăçалхи ултă уйăхра районти 10 гражданин ача усрава илме шутлакансен шкулĕнче вĕреннĕ. Кун пек шкулсем малтан Шупашкарта, Канашра, Çĕмĕрлере ĕçленĕ. Июлĕн 1-мĕшĕнчен вара кандидатсене ятарлă программăпа килĕшỹллĕн опекăпа попечительство органĕсенче вĕрентме пуçланă. Çакна ашшĕ-амăш хỹттисĕр юлнă ачасене харпăр хăй çемйине воспитани пама, опекăна, усрава илес текенсене вĕренме çỹреме чăрмав ан пултăр тесе йышăннă. Тата занятисен 30 процентне сиктерсен - хатĕрленỹре пулни пирки справка илме пулать, ытти занятисене вара тепĕр ушкăнпа вĕренме май пур. Сăмах май, ача йышăнас шухăшлă ашшĕ-амăшне пирĕн районта опека органĕнче иртнĕ юнкун вĕрентме тытăннă, вĕренỹ август вĕçĕчченех пырать.
А.ЗАМУТКИНА.