26 августа 2015 г.
Районти чи аслă вĕрентекенсенчен пĕри, Александра Игнатьевна Сидорова, августăн 10-мĕшĕнче 90 çул тултарнă. Çав хĕвеллĕ кун ун патне Раççей Президентĕнчен саламлă Çыру килнĕ.
Александра Игнатьевна вăрçă пуçланнă çул 16 çулта пулнă. Çавăнпа ун чухнехи йывăр çулсем çинчен кĕнекерен мар, хăй курнипе, тỹснипе пĕлет. Вăрçă çулĕсенче вăл тылра тăрăшнă. Йывăрлăхсене çĕнтерсе Етĕрнери педагогика училищинчен вĕренсе тухнă. Вăрçă хыççăн вăл çак мирлĕ профессипех ĕçленĕ, кĕçĕн классене вĕрентнĕ. 40 çул ĕçленĕ хушăра темиçе ăру вĕрентсе кăларнă. Мăшăрĕпе, Михаил Васильевичпа, çичĕ ача çуратса воспитани панă. Мăшăрĕ çут тĕнчере çук ĕнтĕ. Александра Игнатьевна вара чунне ачисемпе, мăнукĕсемпе йăпатать.
Питĕркасси ялĕнче пурăнакан Мария Семеновна Филиппова та августăн 22-мĕшĕнче хăйĕн 90 çулхи юбилейне кĕтсе илнĕ, Раççей Президенчĕн саламлă Çырăвне тивĕçнĕ. Вăрçă пуçланнă чухне Мария Семеновна 16 çулта пулнă, аслисемпе тан ĕçленĕ, тылра тар тăкнă. Вăрçă хыççăн мăшăрĕпе виçĕ ывăл çуратса ỹстернĕ. Палăртмалла, мăшăрĕ, Михаил Андреевич, Инçет Хĕвелтухăçра çар службинче тăнă, радист пулнă, унтан Яппун вăрçине те хутшăннă. Тăван киле таврăнсан чылай çул хушши районти "Калинин" колхозра председательте вăй хунă. Мария Филиппова вара хăйĕн кун-çулне Перекет банкĕпе çыхăнтарнă, 44 çул тăрăшнă вăл унта.
Паянхи кун тыл ĕçченĕ, ĕç ветеранĕ Мария Семеновна Филиппова кĕçĕн ывăлĕн çемйипе пурăнать, 6 мăнукĕн тата 5 кĕçĕн мăнукĕн çитĕнĕвĕсемпе савăнать. А.ДМИТРИЕВА, А.АЛЕКСЕЕВА.