26 августа 2015 г.
Йăлана кĕнĕ августри педканашлу ĕнер, августăн 25-мĕшĕнче, районти вĕрентỹ тытăмĕнчи нумай-нумай ĕçчене пĕр çĕре пухрĕ. Хĕрлĕ Чутайри Культура çуртĕнче пухăннă педагогсене район пуçлăхĕ Александр Степанов, райадминистрацин пуçлăхĕ Александр Башкиров, ЧР Шутлавпа тĕрĕслев палатин председателĕ Татьяна Минина, вĕренỹ ĕçченĕсен профсоюзĕн районти организацине ертсе пыракан Татьяна Улянды саламларĕç.
Вĕрентỹпе çыхăннă çивĕч ыйтусене сỹтсе явма пухăннисем районти вĕренỹ пайĕн начальникĕн Татьяна Шереметьеван докладне тăнларĕç.
Педканашлăвăн кăмăла çĕклекен саманчĕсенчен пĕри пултаруллă педагогсене тĕрлĕ хисеп хучĕсемпе наградăлани пулчĕ.
Çитĕнекен ăрăва вĕрентес тата тивĕçлĕ воспитани парас ĕçе пысăк тỹпе хывнăшăн тата нумай çул хушши тухăçлă ĕçленĕшĕн Чăваш Республикин Вĕренỹ министерствин Хисеп грамотине Хĕрлĕ Чутай шкулĕн учителĕ Вера Николаевна Артемьева, Атнар шкулĕн вĕрентекенĕ Раиса Егоровна Кузьмина, "Хĕвел" ача сачĕн воспитателĕ Алина Ивановна Сарина, Мишеркасси шкулĕн педагогĕ Наталья Станиславовна Семенова, "Хастар" ФСК-ан тренерĕ Владимир Валентинович Герасимов тата Чăваш Республикин Вĕренỹ министерствин Тав çырăвне Хĕрлĕ Чутай шкулĕн педагогĕ Вероника Николаевна Архипова тивĕçрĕç.
Çавăн пекех педканашлура район пуçлăхĕн, райадминистрацин,Чăваш Патшалăх Канашĕн депутачĕсен, профсоюз тытăмĕн хисеп хучĕсене тивĕçекенсем те чылаййăн пулчĕç, вĕсем пирки хаçатăн çитес номерĕсенче пĕлтерĕпĕр.