28 августа 2015 г.
Тин кăна ентешсене "Пилеш" ача сачĕ Чăваш Ен Пуçлăхĕн 200 пин тенкĕпе танлашакан грантне тивĕçнине пĕлтерсе савăнтарнăччĕ. Тунтикун черетлĕ лайăх хыпар пĕлтĕмĕр: район администрацийĕн куль-турăпа спорт тата архив ĕçĕн пайĕ те Чăваш Ен Пуçлăхĕн 100 пин тенкĕлĕх грантне çĕнсе илнĕ. Кăçал ЧР Культура, национальноçсен ĕçĕсен тата архив ĕçĕн министерстви культурăпа искусство сферинчи инновациллĕ проектсене пулăшас тĕллевпе конкурс ирттернĕ. Шăпах унта район администрацийĕн культурăпа спорт тата архив ĕçĕн пайĕн начальникĕ Александр Самсонов ертсе пынипе "Эпир асра тытатпăр, эпир мухтанатпăр!" проект тăратнă. Асăннă гранта çĕнсе илекенсем пиллĕкĕн пулнă. Савăнсах пĕлтеретĕп, пиллĕкĕшĕнчен тăваттăшĕ тĕп хуламăртан, районсем хушшинче пирĕн Хĕрлĕ Чутай районĕ кăна. Ку ырă хыпаршăн манпа пĕрле пур вулакан та савăнать пулĕ тесе шутлатăп. Маттур, культура пайĕн ĕçченĕсем!
100 пин тенкипе мĕнле ĕçсем тăвĕ-ха культура пайĕ? Палăртатăп: асăннă проектпа килĕшỹллĕн кăçал пирĕн район паттăр ентешĕмĕрсен, Совет Союзĕн Геройĕсен Алексей Логиновпа Иван Индряковăн мухтавлă çар ĕçĕсем пирки буклетсемпе компакт-дисксем кăларма тĕллев лартнă. Çавăн пекех "Катюша" реактивлă установкăсен чапа тухнă батарейин пĕрремĕш ракетчикĕ-сен, хамăр районта çуралса ỹснĕ Алексей Захаровăн, Иван Конновăн тата Степан Плисовăн паттăрлăхĕ пирки те тĕплĕн паллаштарасшăн. Асаилтеретпĕр, асăннă батарейăри тăватă çынтан виççĕшĕ - хĕрлĕчутайсем. Пирĕн кунпа мăнаçланмалли пурах. Буклетсемпе компакт-дисксене районти шкулсене, вулавăшсене тата культурăпа кану учрежденийĕсене валеçсе парĕç. Проекта культурăпа спорт тата архив ĕçĕн пайĕ кăçалхи сентябрь-ноябрь уйăхĕсенче, республикăра культура пулăмĕсен марафонĕ пынă вăхăтра, пурнăçа кĕртесшĕн. Юлашкинчен гранта çĕнсе илме хутшăннă ĕçченсене саламласа тав тăватăп, малашне те ỹсĕмсем сунатăп.
Алина ОРИНОВА.