04 сентября 2015 г.
Юнкун, сентябрĕн 2-мĕшĕнче, Чăваш Енри прессăн спорт фестивалĕн пĕрремĕш тапхăрĕ иртрĕ. Кăçалхипе улттăмĕш хут иртекен прессăн спорт фестивалĕ - çăмăл атлетика чупăвĕ - "Пирĕн пурнăç" парнисене çĕнсе илессишĕн тата А.Г.Николаев летчик-космонавта асăнса иртрĕ. Çавна май кăнтăрла иртсен Хĕрлĕ Чутай салин Тĕп стадионĕ спортпа тата район хаçачĕпе тачă çыхăну тытакан шкул ачисемпе, тĕрлĕ çĕрте ĕçлекенсемпе тулчĕ.
Спорт уявне пухăннисене район пуçлăхĕ Александр Степанов, район администрацийĕн пуçлăхĕ Александр Башкиров, "Пирĕн пурнăç" район хаçачĕн тĕп редакторĕ Алина Оринова, ăмăртусен тĕп судйи Алексей Никитин саламларĕç, спортсменсене ăнăçу сунчĕç.
Чи малтанах ырă йăлана кĕнĕ çăмăл атлетика эстафетин чупăвне vip-персонăсем - район, райадминистрацин пай ертỹçисем, Атнар, Ачкасси, Мăн Этмен ял тăрăхĕсен пуçлăхĕсем - тухрĕç. Ытти ял тăрăхĕсен пуçлăхĕсем хĕвеллĕ те ăшă çанталăкра темшĕн чупма кăмăл тумарĕç. Кăлăхах, спорт сывлăха та, туслăха та çирĕплетет...
Унтан старта спорт çемйисем тухрĕç. Кăçал вĕсем иртнĕ çулхинчен те нумайрах пулчĕç, икĕ ушкăна пайланса чупрĕç: ашшĕ-амăшĕ тата 7 çула çитмен ача; ашшĕ-амăшĕ тата 13 çула çитмен ача. Пĕрремĕш ушкăнра финиша чи малтан Кив Атикасси ял тăрăхĕнчи Алексеевсен, иккĕмĕш Питĕркассинчи Герасимовсен, виççĕмĕш Матюшкинсен çемйисем тухрĕç. Иккĕмĕш ушкăнра финиша чи малтан Калкассинчи Катюковсен çемйи чупса тухрĕ. Çак ялти Алексеевсен çемйи финиша иккĕмĕш, Мăн Этменти Захаровсем виççĕмĕш çитрĕç. Ытти ушкăнсенчи эстафетăсенче вара чи вăйлисем, хăвăртраххисем çаксем пулчĕç:
- Пĕтĕмĕшле пĕлỹ паракан тĕп шкулсем хушшинче Хĕрлĕ Чутай шкулĕн спортсменĕсене çитекен пулмарĕ. Çĕн Атикасси шкулĕн вĕренекенĕсем иккĕмĕш тухрĕç, виççĕмĕшне - Хусанушкăнь шкулĕн çамрăк спортсменĕсем.
- Пĕтĕмĕшле пĕлỹ паракан вăтам шкулсем хушшинче те Хĕрлĕ Чутай шкулĕнче вĕренекенсем çĕнтерчĕç. Çĕнатикассисем - иккĕмĕш, мăнэтменсем - виççĕмĕш.
- Хĕрарăмсем хушшинче яланхи пекех Хĕрлĕ Чутай райповĕн пикисем пĕрремĕш вырăн йышăнчĕç. Иккĕмĕш вырăна Мăн Этмен ял тăрăхĕн команди, виççĕмĕшне çĕнатикассисем тухрĕç.
- Арçынсен ушкăнĕнче те райпо тытăмĕн команди чи вăйли пулчĕ. Райадминистраци ĕçченĕсен команди иккĕмĕш тухрĕ.
- Ял тăрăхĕсен пĕрлештернĕ командисем хушшинче Хĕрлĕ Чутай ял тăрăхĕ çĕнтерчĕ. Иккĕмĕшпе виççĕмĕш вырăнсене Мăн Этмен тата Кив Атикасси ял тăрăхĕсем йышăнчĕç.
- Тĕп ушкăнра райпо команди пĕрремĕш, райадминистраци - иккĕмĕш, райбольница команди виççĕмĕш тухрĕ.
- Спорт ветеранĕсем хушшинче Валентин Харитоновпа Илья Иванов палăрчĕç. (Сăмах май, вĕсем республикăн пĕрлештернĕ командипе пĕрле август уйăхĕн вĕçĕнче Челябинскра иртнĕ Раççейри çăмăл атлетика енĕпе уçă чемпионата хутшăннă. Палăртма кăмăллă, уйрăм ăмăртура Валентин Ефимович 110 метр хỹмесем урлă чупса виççĕмĕш вырăн йышăннă. - Авт.).
Çĕнтерỹçĕсем пурте район администрацийĕн грамотисене, "Пирĕн пурнăç" хаçат парнисене - район хаçатĕнче пĕр хут тỹлевсĕр пĕлтерỹ е салам пичетлеме ирĕк паракан купона - тивĕçрĕç.
Чăваш Енри прессăн спорт фестивалĕн пĕрремĕш тапхăрĕнче палăрнисем ыран, сентябрĕн 5-мĕшĕнче, пирĕн паллă ентеш Андриян Николаев летчик-космонавт çуралнă кун, ăна асăнса иртекен спорт фестивалĕн Шупашкарта иртекен иккĕмĕш тапхăрне хутшăнĕç. "Советская Чувашия" хаçат парнисемшĕн иртекен 77-мĕш эстафетăна хĕрлĕчутайсем тивĕçлĕ хутшăнса малти вырăнсене йышăнасса шанатпăр.
Фоторепортаж
А.ЗАМУТКИНА.
Источник: "Пирěн пурнăç"