04 сентября 2015 г.
Паянхи вĕрентĕве эпир патшалăх экзаменĕсемпе çыхăнтармасăр пултараймастпăр та пулĕ. 11-мĕш класс хыççăн кăна мар, 9-мĕшпе 4-мĕш хыççăн та хăйне евĕр тĕрĕслев витĕр тухаççĕ халĕ шкул ачисем. Çавăнпа та шкул ачисене патшалăх тĕрĕслевне хатĕрлесси вĕрентекенсемшĕн питĕ пысăк яваплăх шутланать. Çакна курах пулĕ районти педагогсен кăçалхи августри канашлăвĕнче нумай çул хушши тỹрĕ кăмăлпа ĕçленĕшĕн тата вĕренекенсене патшалăхăн пĕтĕмлетỹ аттестацине тухăçлă хатĕр-ленĕшĕн Хĕрлĕ Чутайри вăтам шкулăн вырăс чĕлхипе литература учителĕ Валентина Андреевна Кудряшова тата Мăн Этмен шкулĕнчи вырăс чĕлхипе литература учителĕ Зинаида Григорьевна Полозина район администрацийĕн Хисеп грамотине тивĕçрĕç.
Райадминистрацин вĕренỹ пайĕн кăтартăвĕсемпе, кăçалхи патшалăх экзаменĕсен пĕтĕмлетĕвĕпе вырăс чĕлхипе Хĕрлĕ Чутай шкулĕн вăтам балĕ 69,48, Мăн Этмен шкулĕн 67, 65 пулнă. Ку республикăри вăтам балпа танах. Палăртмалла, вырăс чĕлхипе районти пĕр вăтам шкулта кăна - Питĕркассинче - патшалăх экзаменне ăнăçлă тытайманнисем пулнă, ытти шкулсенче ачасен 100 проценчĕ ăнăçлă тытнă. Шел те, математикăпа экзаменсене тытайманнисем Атнарти, Мăн Этменти, Питĕркассинчи шкулсенче пулнă. Патшалăх экзаменĕсенче пысăк балсем (80 тата ытларах) пухакан выпускниксем пирки калас пулсан, вĕсем ытларах Хĕрлĕ Чутай тата Мăн Этмен шкулĕсенче пулни палăрать. Юлашки пилĕк çул кăтартăвĕсене танлаштарсан вара, пĕтĕмĕшле илсен районти шкулсенче вĕрене-кенсен пĕлỹ шайĕ ỹссе пыни сисĕ-нет. Акă вырăс чĕлхипе, обществознанипе, физикăпа, биологипе, химипе, историпе патшалăх экзаменне тытакансен вăтам балĕ ỹснĕ.
Çав хушăра: Экзаменсемпе çыхăннă çĕнĕлĕхсем пурнăçа кĕрсе пыраççех. Кăçал 9-мĕш класра вĕренме пуçланисем вĕренỹ çулĕн вĕçĕнче тăватă экзамен тытĕç: вырăс чĕлхипе тата математикăпа - пурте, тепĕр икĕ предметне суйласа илсе. Вырăс чĕлхипе математика экзаменĕсен кăтартăвĕсем аттестат илме кирлĕ пулĕç. Тата тепĕр çултан вара суйласа илнĕ предметсен кăтартăвĕсем те аттестата витĕм кỹрĕç. Çавăн пекех 2020 çултан пуçласа 11-мĕш класс хыççăн пур ачана та ют чĕлхепе экзамен тыттармалла тăвасшăн. Патшалăх экзаменĕсен ĕçĕсенче те улшăнусем пуласси паллă. Вырăс чĕлхипе, историпе тата литературăпа сăмахпа каласа хуравламалли экзаменсем кĕртесшĕн. Экзаменсен тест пайĕсене вара (темиçе хуравран пĕрне, тĕрĕссине, суйласа илмеллине) кĕскетесшĕн. 2015 çулта ку улшăну вырăс чĕлхипе литературине, математикăна пырса тивнĕ пулсан, 2016 çулта историпе, обществознанипе, географипе, информатикăпа тест пайĕ пачах пулмĕ. Малашне тест пайне пур предметпа та пĕтересшĕн. Çитес çул аслă вĕренỹ заведенийĕсене вĕренме кĕрес тесен патшалăх экзаменĕ-сенче балсем ытларах пухма тивĕ.
А.КАРПОВА.
Источник: "Пирěн пурнăç"