16 сентября 2015 г.
Сентябрь уйăхĕн пуçламăшĕнче Чăваш Республикинчи потребительсен союзĕ 95 çулхи юбилейне анлăн паллă турĕ. Чăваш патшалăх оперăпа балет театрĕнче иртнĕ савăнăçлă уява Чăваш Ен Пуçлăхĕн тивĕçĕсене вăхăтлăх пурнăçлакан Михаил Игнатьев хутшăнчĕ тата юбилярсене саламлама власть, саккун кăларакан органсен, тĕрлĕ организацисен представителĕсем йышлăн пухăнчĕç. Пирĕн районтан уявра 25-ĕн пулчĕç. Малтан хăнасем театр фойинче йĕркеленĕ куравра Чăвашпотребсоюз предприятийĕсен продукцийĕпе паллашрĕç. Потребительсен кооперацийĕн историйĕпе паянхи пурнăçне халалласа ятарлă фильм ỹкернĕ. Вăл унăн тĕп çул-йĕрне туллин кăтартса парать. Чăвашпотребсоюз Канашĕн председателĕ, Раççей Федерацийĕн Центросоюз Канашĕн членĕ, Чăваш Республикин Патшалăх Канашĕн депутачĕ Валерий Павлов паянхи ỹсĕмпе кĕскен паллаштарчĕ. Чăвашпотребсоюз потребительсен 19 обществине тата 100-е яхăн предприятие пĕрлештерсе тăрать, унăн пĕтĕмĕшле ĕç-хĕлĕн çулталăкри калăпăшĕ - 11 миллиард тенкĕ. Организаци, тĕпрен илсен, ял çыннисен ыйтăвĕсене тивĕçтерет. Республикăра пурăнакан ял халăхĕн 60 проценчĕ потребкоопераци пулăшăвĕпе усă курать. Михаил Игнатьев потребительсен кооперацийĕн ветеранĕсене, ĕçченĕ-сене, пайçăсене уявпа чĕререн саламларĕ. Вăл Чăвашпотребсоюз вун-вун çул ялхуçалăхне, суту-илĕве, хальхи ял сăн-сăпатне лайăхлатас тĕлĕшпе пĕлтерĕшлĕ вырăн йышăннине, сакăр пине яхăн çынна ĕç вырăнĕсемпе тивĕçтернине, çын сахал пурăнакан, лавкка тытса тăма тăкаклă инçетри ялсене те кирлĕ тавара вăхăтра çитерсе панине палăртрĕ. "Чăвашпотребсоюз 20 çула яхăн Раççей Центросоюзĕн экономика ăмăртăвĕнче малти вырăнсене йышăнать", - терĕ Михаил Игнатьев. - Лайăх хыпарсем илтме кăмăллă: иккĕмĕш квартал пĕтĕмлетĕвĕсем тăрăх Чăвашпотребсоюз хăйĕн пĕтĕмĕшле ĕç-хĕлне аталантарас енĕпе çĕршыври потребительсен кооперацийĕнче тата федерацин Атăлçи округĕнче пĕрремĕш вырăн йышăннă". Вăл потребкоопераци ветеранĕсемпе ĕçченĕсене хăйсен профессине юратнăшăн, халăхпа тимлĕ пулнăшăн, тавар кăларакансемпе килĕш-терсе ĕçленĕшĕн тав турĕ. Уявра ĕçре палăрнисене наградăсем пачĕç, сцена ăстисем концертпа савăнтарчĕç. Хисепе тивĕçнисен йышĕ-нче пирĕн районти райпо тытăмĕн ĕçченĕсем те пулчĕç. Райпо канашĕн председательне Александр Степанова чи лайăх ертỹçĕ шутне кĕртсе "За стабильное развитие Чувашпотребсоюза" номинаципе чысларĕç, "Питание" тулли мар яваплă обществăн генеральнăй директор çумне Валентина Дмитриевна Патьянована (сăнỹкерчĕкре) "Чăваш Республикин халăха пулăшас тытăмри тава тивĕçлĕ ĕçченĕ" хисеплĕ ят пачĕç. "Единая Россия" парти райпо товароведне Надежда Варламована Тав çырăвĕпе чысларĕ. А.САН.
Источник: "Пирěн пурнăç"