Публикации » Соцпакет е укçа?

23 сентября 2015 г.

Федерацин Чăваш Енре пурăнакан çăмăллăхçисем 2016 çулта социаллă пулăшу пуххипе еплерех усă курассине кăçалхи октябрĕн 1-мĕшĕччен уçăмлатмалла. Соцпакет е унăн уйрăм пайĕ вырăнне укçа тивĕçес текенсен малтан кашни уйăхрах Пенси фондне заявлени памалла пулнă. Ку йĕркене пăрахăçлани темиçе çул ĕнтĕ. Халĕ пĕр хутчен çырса пĕлтерни çителĕклĕ. Енчен те çăмăллăхçă хăйĕн шухăш-кăмăлне улăштарать пулсан - тỹлевсĕр эмел вырăнне укçа илес тесен - Пенси фончĕн вырăнти управленине заявлени çырса памалла. Социаллă пулăшу пуххи виçĕ пайран тăрать: врач рецепчĕпе тỹлевсĕр эмел илесси, санатори-курортра канасси тата транспорт çăмăллăхĕпе усă курасси. Соцпакетпа пĕтĕмĕшпе е унăн хăш-пĕр пайĕпе уйрăммăн та усă курма пулать. Хальхи вăхăтра соцпакет хакĕ уйăхра 930 тенкĕ те 12 пуспа танлашать, çав шутра эмел пайĕ (врач рецепчĕпе тỹлевсĕр эмел) - 716 тенкĕ те 40 пус, санаторипе курорт пайĕ (тухтăр сĕннипе санаторире сипленмелли путевка) - 110 тенкĕ те 83 пус, транспорт пайĕ (хула çывăхĕнчи пуйăспа тỹлевсĕр çỹресси, санаторие çăмăллăхпа кайса килесси) 102 тенкĕ те 89 пус.

Источник: "Пирěн пурнăç"