23 сентября 2015 г.
Пĕтĕм Раççейри "Халăх участковăйĕ" конкурс пирĕн çĕршывра тăваттăмĕш хут иртет. Чи лайăх участковăя граждансем Интернет урлă сасăласа палăртаççĕ. Çакă полици ĕçченĕсен ĕçне хаклама тата шалти ĕçсен органĕ-семпе общество хушшинчи çыхăнăва уççăн кăтартса пама май парать. Конкурс йăлана кĕнĕ йĕркепе виçĕ тапхăрпа иртет. Акă сентябрĕн 16-мĕшĕнчен асăннă конкурсăн пĕрремĕш тапхăрĕ пуçланнă. Унта хутшăнакансен йышĕнче Хĕрлĕ Чутайри полици уйрăмĕн сотрудникĕ Сергей Герасимов та пур. Пĕрремĕш тапхăр паян вĕçленет, юлашки самантпа усă курса онлайн-сасăлав мелĕпе Сергей Игоревичшăн сасăлама пултаратпăр. Сăмах май, хальхи вăхăтра Сергей Герасимов Пантьăк, Тралькасси ял тăрăхĕсен участковăйĕ, 3500 çын пурăнакан 15 ялти йĕркелĕхшĕн, оперативлă лару-тăрушăн яваплă. Кăçалхи сакăр уйăхра вăл 14 преступление шута илнĕ, вăл шутра браконьерствăпа çыхăннă преступлени те пур. Вĕсенчен 13-шне уçса панă. Сергей Игоревич учетра тăракан 16 çынна та сăнаса тăрать, вĕсемпе кашни уйăхрах профилактика ĕçĕсем туса ирттерет. Январь-август уйăхĕсенче участковăй йĕрке пăсакансем пирки 158 административлă протокол çырнă, çав хушăрах граждансен 233 çăхавĕ-пе ыйтăвне пăхса тухнă, 16 отчет тунă. 32 çулхи Сергей Герасимов полици капитанĕ полицинче 2007 çултанпа вăй хурать. Тỹрĕ кăмăлпа ĕçленĕшĕн вăл Раççей Федерацийĕн тата Чăваш Республикин шалти ĕçсен министерствисен Тав çырăвĕ-сене тивĕçнĕ. Хĕрлĕ Чутайри полици уйрăмĕн участковăйĕ Сергей Герасимов конкурсăн регионти тапхăрне тухасси граждансен сасăлавĕнчен килет, çавăнпа район çыннисен активлăрах пулмалла.
А.ЗАМУТКИНА.
Источник: "Пирěн пурнăç"