Публикации » Ачасене ырри патне туртăнма вĕрентет

02 октября 2015 г.

Пирĕн районта ачасене пĕлỹпе воспитани парас ĕçре чунтан тăрăшакан педагогсем сахал мар. Пĕр-пĕр предмет вăрттăнлăхĕсене алла илме пулăшнипе пĕрлех вĕсем ачасене ырри патне туртăнма та вĕрентеççĕ. Атнарти вăтам шкулта вырăс чĕлхипе литература вĕрентекен Раиса Кузьмина пирки те çакнах калама пулать. 24 çул хушшинче вăл миçе ачана вырăсла тĕрĕс çырма тата калаçма, литературăна юратма вĕрентмен-ши? Кĕнекесенчи сăнарсен тĕслĕхĕпе усă курса пурнăçра тухса тăракан ыйтусене татса пама, лайăхпа япăха уйăрса илме пулăшнă. Раиса Кузьминан вĕренекенĕсем çулсерен тĕрлĕ шайри олимпиадăсемпе конкурссене хутшăнса малти вырăнсене йышăнни, патшалăх экзаменĕсенче лайăх балсем пухни _ унăн ĕçĕн кăтартăвĕ-сем. Раиса Егоровна хăй те тĕрлĕ конкурссене хутшăнса ăсталăхне туптать. Педагогсен августри канашлăвĕнче çитĕнекен ăрăва вĕрентес тата воспитани парас ĕçе пысăк тỹпе хывнăшăн, нумай çул хушши тухăçлă ĕçленĕшĕн Раиса Кузьминана ЧР Вĕренỹ министерствин Хисеп грамотипе чысларĕç.

А.КАРПОВА.

Источник: "Пирěн пурнăç"