14 октября 2015 г.
Ял ĕçченĕсем ку вăхăт тĕлне пахчари, уй-хирти ĕçсене вĕçленĕпе пĕрех ĕнтĕ. "Коминтерн" ялхуçалăх производство кооперативĕнче те пĕрчĕллĕ тата пăрçа йышши культурăсене тахçанах пухса кĕртнĕ, халĕ кунти ĕçченсем кукуруз уйĕнче тăрăшаççĕ. Кăçал хуçалăх ку паха культурăна 270 гектар çинче ỹстернĕ. Тунтикун тĕлне кукурузăна силослăх 150 гектар лаптăкран пухса илнĕ, икĕ пин тонна ытла силос хывнă. Атнарсем силоса ферма çывăхне тĕмесене хываççĕ. Темиçе çул ĕнтĕ кукурузăна "Коминтернра" çĕнĕ йышши "ПАЛЕССЕ-FS80" комбайнпа пуçтараççĕ. Ку техникăна ЧР тава тивĕçлĕ механизаторне Илья Пономарева шанса панă. Çавăн пекех Александр Фондеркин, Геннадий Мигушкин, Андрей Андреев, Дмитрий Куропаткин, Владимир Романов, Алексей Андреев, Александр Михопаров, Лев Кашкиров ĕçченсем силос хывнă çĕрте тăрăшаççĕ, пĕрисем комбайн вĕтетсе панă массăна тĕме патне турттараççĕ, теприсем ăна техникăпа таптаса пусăрăнтараççĕ. Кукурузăран хатĕрленĕ силос пысăк тутлăхлă, пахалăхлă выльăх апачĕ шутланать. "Коминтерн" ЯХПК черетлĕ ялхуçалăх çулталăкне лайăх кăтартусемпе вĕçлет. Хуçалăх ĕçченĕсем кăçалхи вырмара 1539 гектар лаптăкран пĕрчĕллĕ тата пăрçа йышши культурăсене пухса кĕртнĕ, 3820 тонна тĕштырă çапса илнĕ. Çитес çул валли кĕрхи пĕрчĕллĕ культурăсене 576 гектар çинче акса хăварнă, вăл шутра тулă 476 гектар, тритикале 100 гектар. Выльăхсене ăнăçлă хĕл каçарма 450 тонна утă, 5700 тонна сенаж, 2000 тонна ытла силос янтласа хунă. Хуçалăхри пĕтĕм ĕçе механизациленĕ. Кооперативра паян 102 çын вăй хурать, вĕсенчен 65-шĕ хуçалăхра 20 çул ытла ĕçлет. Кунта ĕçлекенсен уйăхри вăтам ĕç укçи 21 пин тенкĕпе танлашать.
А.ДМИТРИЕВА.
Источник: "Пирěн пурнăç"