16 октября 2015 г.
Ĕнер пирĕн районта Статистика кунĕ пулчĕ Çавна май районта Чăвашстатăн ертỹçи Эльвира Максимова тата статистика специалисчĕсем пулчĕç. Эльвира Геннадьевна райадминистрацин Пысăк залне ларăва пухăннă вырăнти хăйтытăмлăх органĕсен, организацисемпе предприятисен ĕçченĕсем умĕнче тухса калаçрĕ, статистикăпа çыхăннă чылай ыйту çинче чарăнса тăчĕ.
Сăмахран, вăл Чăвашстата пыракан статистика отчечĕсен 80 проценчĕ электрон майпа çитнине, çав хушăрах пирĕн районта ку цифра 60 процентпа çеç танлашнине пĕлтерчĕ, çавăнпа хĕрлĕчутайсене хальхи йышши стандартсемпе килĕшсе тăрас тесен активлăрах ĕçлеме сĕнчĕ. Эльвира Максимова çавăн пекех хальхи вăхăтра микроçырав пыни, çитес вăхăтра статистика органĕсене централизацилесси, отчетсене тĕрĕс мар тата темиçе хут панăшăн штрафсен виçи ỹсесси пирки каларĕ. Бухгалтерсене отчетсемпе тимлĕрех пулмаллине аса илтерчĕ. Чăвашстат ертỹçи 2015 çулта электрон мелпе статистикăпа бухгалтери отчечĕпе тивĕçтерекен районти предприятисем хушшинчи чи лайăх респондента асăнчĕ. Вăл - "Бытовик" тулли мар яваплă общество. Унăн директорĕ Анатолий Ейков ларура Чăвашстатăн Дипломне тата статистика службин асăнмалăх парнине тивĕçрĕ.
Лару хыççăн пухăннисемпе Чăвашстатăн специалисчĕсем статистикăпа бухгалтери отчечĕсемпе çыхăннă ыйтусемпе семинарсем ирттерчĕç. Эльвира Максимовапа районти статистика пайĕн начальникĕ Наталья Чишкина вара Хĕрлĕ Чутайри вăтам шкулта вĕренекенсемпе калаçу ирттерчĕç. Чăвашстат ертỹçи çак кун район хаçачĕн коллективĕпе те тĕл пулчĕ, журналистсем панă 30 ытла ыйтăва хуравларĕ. Унăн хуравĕсенчен эпир çакна пĕлтĕмĕр:
- 2015 çулхи январĕн пĕрремĕшĕ тĕлне пирĕн район территорийĕнче 15 571 çын пурăннă, унтан 2637-шĕ ĕçлеме юрăхлă тапхăра çитмен, 7921-шĕ ĕçлеме пултараканни, 5013 çын тивĕçлĕ кану тапхă- рĕнче.
- Çитес çулхи ялхуçалăх çыравне хатĕрленсе паянхи кун тĕлне çырав объекчĕсен списокне актуализацилес тĕлĕшпе районта нумай ĕç тунă. Октябрĕн 1-мĕшĕ тĕлне çак списока 7 ялхуçалăх организацийĕ, 13 микропредприяти, 21 хресченпе фермер хуçалăхĕ, 19 уйрăм предприниматель, 10059 уйрăм хушма хуçалăх тата уйрăм çурт-йĕр строительствин 39 объекчĕ кĕнĕ. Çырав вăхăтĕн-че вĕсем патне çыравçăсем çитсе ыйтусем парĕç. Республикăри ытти муниципалитетсемпе танлаштарсан пирĕн районти граждансен сад-пахча тата дача пĕрлешĕвĕсем çук.
- Çырав объекчĕсен списокне йĕркеленĕ чухне районта хупăннă 9 ялхуçалăх организацийĕ, 1 фермер хуçалăхĕ, 2 уйрăм предприниматель тĕл пулнă. Вĕсем ĕçлемеççĕ пулин те, вĕсен ячĕпе Раççей реестрĕн управленийĕнче çĕр шутланса тăрать.
- Бизнес-çырав çĕршывра юлашки хут 2010 çул пĕтĕмлетĕвĕсемпе 2011 çулта иртнĕ. Кун пек çырав çитес çул пулать. Ун чух районти 40 ытла пĕчĕк предприятие, 200 ытла уйрăм предпринимателе тĕрĕслĕç. Вĕсем район тата республика экономикине мĕнле тỹпе хывни паллă пулĕ.
- Çырав вăхăтĕнче çыравçăра ĕçлес килет пулсан Чăвашстатăн официаллă сайтне резюме ярса памалла.А.ЗАМУТКИНА.
Источник: "Пирěн пурнăç"