28 октября 2015 г.
Хĕрлĕ Чутай салинче çуралса ỹснĕ, хальхи вăхăтра Чăваш патшалăх университечĕн ĕçлевлĕх математикин факультечĕн деканĕнче, актуарлă тата финанс математикин кафедра заведующийĕнче тăрăшакан Александр Юрьевич Иваницкий ĕнер 60 çул тултарнă. 1973 çулта Хĕрлĕ Чутайри вăтам шкултан вĕренсе тухсан Александр Юрьевич Чăваш патшалăх университечĕн физикăпа математика факультетне çул тытнă. 1978 çулта унтан вĕренсе тухсан вара асăннă университетрах ĕçлеме пуçланă.
Мĕншĕн шăпах математикăпа çыхăнтарнă-ха вăл хăйĕн ĕçне? Профессор пĕлтернĕ тăрăх, математикăпа вăл мĕн ачаранах кăсăкланнă. Ача чухне уйра ĕне кĕтĕвне пăхнă вăхăтра Александр паллă математиксем çинчен çырнă кĕнекесене вуланă. Шкулти математика учителĕ-сем Г.И.Ярабаевапа И.И.Стекольщикова та унăн пуласлăхне витĕм кỹнĕ. Университетра чухне вара математикăпа кăсăкланасси ỹснĕ, ăна ытларах хисеплеме пуçланă. Университетра 40 çула яхăн ĕçленĕ хушăра Александр Иваницкий 1500 ытла студент вĕрентсе кăларнă, 60 ытла наукăпа методика ĕçĕ çырса хатĕрленĕ. Александр Юрьевич ĕçĕсем Раççейре кăна мар, ют çĕршывсенче те пичетленнĕ.
Ют çĕршывсем тенĕрен, пирĕн ентеш унта икçĕр хут ытла та пулнă. МГУ-н аспирантуринчен вĕренсе тухнăскер хăй вăхăтĕнче АПШ-ри Огайо штатĕнчи университетра ятарлă курссенче вĕреннĕ. Америка тăрăх тăлмачă илсе çỹрес мар тесе акăлчан чĕлхине вĕреннĕ, халĕ ĕçлĕ калаçусене хăех ирттерет. Александр Иваницкий йĕркеленĕ фирма ют çĕршыва тавар сутакан Раççейри ертсе пыракан пилĕк фирма шутне кĕрет. Çак ĕç республикăна пысăк усă кỹрет _ ют çĕршывран пирĕн пата укçа кĕрет. Ĕçлесе илнĕ укçаран Александр Юрьевич ĕçтешĕсене кĕнеке кăларма пулăшать, пуян мар çемьесенчи ăслă-тăнлă студентсене стипенди парса тăрать. Хăй вăхăтĕнче Александр Иваницкий "Раççей Феде-рацийĕн аслă шкулĕн тава тивĕçлĕ ĕçченĕ", "Чăваш Республикин тава тивĕçлĕ вĕренỹ ĕçченĕ" хисеплĕ ятсене, РФ Вĕренỹпе наука министерствин Хисеп грамотине тивĕçнĕ.
Пĕлтĕр вара районта иртнĕ Акатуйра Александр Иваницкие "Районăн хисеплĕ гражданинĕ" ят парса чысларĕç. Ку хисеплĕ ята район умĕнче ырă ĕçсемпе уйрăмах палăрнă çынсене параççĕ. Наукăпа вĕренỹри çитĕнỹсемпе пĕрлех Александр Юрьевич спортпа туслашма та вăхăт тупать - пысăк теннис енĕпе тĕрлĕ ăмăртусене те хутшăнать. Çавăн пекех вăл акăлчан чĕлхиллĕ рок-музыкăпа та кăсăкланать теççĕ.
А.КАРПОВА.
Источник: "Пирěн пурнăç"