30 октября 2015 г.
Туктамăшри Культура çуртĕнче вара октябрĕн 27-мĕшĕнче шăпах çапла пулчĕ те: ăшă, çутă, хăтлă клуба халăх чылай пухăнчĕ. Хĕрлĕ Чутай ял тăрăхĕнчи пултаруллă артистсем Николай Сидоров пьеси тăрăх лартнă "Кăвак сирень айĕнче" спектакль куракансен чунне тỹрех тыткăна илни сисĕнчĕ.
Юрă-кĕвĕллĕ комеди пурнăçра тăтăшах тĕл пулакан лару-тăрăва сăнласа парать. Кулине (Лилия Миронова) Йăван ывăлне (Александр Быков) ĕçчен кỹршĕ хĕрĕпе Манюкпа (Вера Терентьева) пĕрлештересшĕн. Йăванăн чунĕ вара хула хĕрĕ Вика (Алена Кучекеева) патне туртăнать. Çак лару-тăрăва Хĕлип (Владимир Оринов), Паша (Александр Башкиров), Мефодий Степанович (Николай Чернов), Даша (Нина Чуракова) хутшăнни спектакле тата кулăшларах тăвать. Юлашкинчен пурте хăйсен телейне тупни те куракансене савăнтарчĕ.
Артистсем пурте рольсене ĕненмелле калăпласа пачĕç. Уйрăмах Лилия Мироновапа Александр Башкиров сцена çине тухсан спектакль курма килнисем чунтанах ахăлтатса кулчĕç - питĕ ăста вылярĕç вĕсем хăйсен ролĕсене.
Хăйсен кăмăлĕсене тивĕçтернĕренех пулĕ спектакль вĕçленсен куракансем артистсене тăвăллăн алă çупса саламларĕç.
Алина КАРПОВА.