30 октября 2015 г.
Паян районта 19 хресченпе фермер хуçалăхĕ шутланать. Вĕсенчен 13-шĕ - ĕçе тытăнакан фермерсем, иртнĕ çул кăна регистрациленнĕ-ха. Пурте тенĕ пекех выльăх-чĕрлĕх ĕрчетме пикеннĕ. Вĕсем хальлĕхе экономика, административлă хỹмесем урлă каçса ĕç-хĕлне майлаштарса пыраççĕ темелле. Çавăнпа вĕсем район экономикинче çирĕп вырăн йышăнаççĕ тесе калама йывăртарах. Патшалăхран çăмăллăхлă майсемпе илнĕ укçа-тенкĕпе аталанма тăрăшаççĕ пулин те чăрмавсем пайтах тухса тăраççĕ. Чи малтанах туса илнĕ продукцие тивĕçлĕ хакпа вырнаçтарма май çукки тата сĕрмелли-çунтармалли материалсем хакланса кайни ура хурать вĕсене. Çакăн çинчен пăшăрханса калаçрĕ те Пантьăк ял тăрăхĕнчи Николай Лисаев фермер тĕл пулса калаçнă май. "Топливо питĕ хаклă, пĕр литр туянма миçе килограмм тырă сутмалла?" - чунĕ ыратнине пытармарĕ вăл.
Кăçал фермер пĕрчĕллĕ тата пăрçа йышши культурăсене 782 гектар çинчен пухса кĕртнĕ, 1720 тонна тĕштырă çапса илнĕ. Тухăçĕ иртнĕ çулхинчен лайăхрах - 22 центнер. Иккĕмĕш çăкăра 3 гектартан 200 тонна пуçтарса илнĕ.
Фермер хăй туса илнĕ продукцие вырнаçтарса тунă укçапа кредитсемпе татăлса пырать. Сезона кура кĕрекен тупăшпа çитерсе пыма йывăр, паллах. Тыр-пул туса илнисĕр пуçне, вăл иккĕмĕш çул бройлер чĕпписем ỹстерсе халăха сутать.
Кăçал вăл 28 пин бройлер чăх тата кăвакал чĕпписем ỹстернĕ, унтан 25 пине яхăн чĕппе сутса укçа тунă.
Техника паркне те пысăк тимлĕх уйăрать фермер. Юлашки çулсенче 14 ялхуçалăх техники туяннă. 2013 çулта "Полесье", кăçал "Агромаш" комбайнсемпе пуянланнă. Паллах, кивçен илмесĕр хуçалăха хăйĕн укçипе кăна аталанма йывăр. Раççей ялхуçалăх банкĕнчен тăтăшах çăмăллăхлă кредит илни ăна пулăшса пырать.
Аталанса пыма çăмăлах мар пулин те Николай Лисаев усă куракан çĕр лаптăкне ỹстерсе пырать. Çĕр ытларах пусă çаврăнăшне кĕртес тесен районта арканнă хуçалăхсен çĕрĕсем çителĕклех. Хальлĕхе пурне те сухаласа акса хăварма вăй çитеймест. Çапах çитес çул валли фермер хуçалăхĕ 400 гектар çĕр хатĕрлесе кĕрхи культурăсем акса хăварнă. Механизаторсем 450 гектар кĕрхи çĕртме тунă.
Хăйĕн хуçалăхĕнче ĕçлекенсемпе вара Николай Иванович чăннипех мухтанать. Ялхуçалăх ĕçне чунпа парăннă çынсем ĕçлеççĕ ун патĕнче. Георгий Судаков, Юрий Тибогайкин, Михаил Сорокин, Геннадий Матвеев тата ыттисем нумай çул тăрăшса тỹрĕ кăмăлпа вăй хураççĕ.
А.ЗАМУТКИНА.