30 октября 2015 г.
Кун пирки 168 № Указа Чăваш Республикин Пуçлăхĕ Михаил Игнатьев октябрĕн 28-мĕшĕнче алă пусса çирĕплетнĕ. Асăннă хыпар питĕ савăнтарать.
Раççей Ялхуçалăх министерствин ялсене тата социаллă политикăна аталантарассипе ĕçлекен Департамент директорĕпе Дмитрий Тороповпа ирттернĕ ĕçлĕ тĕлпулура Чăваш Ен Пуçлăхĕ çапла палăртнă: республикăра культурăпа кану центрĕн 10 объекчĕ пулĕ, хальлĕхе проектпа смета ĕç хучĕсене хатĕрлес тапхăр пырать. 2016 çул валли йышăннă бюджет проектне те укçа-тенкĕне виçĕ объект валли пăхса хăварнине пĕлтернĕ. Юлашки виçĕ çул хушшинче республикăри районсенче, аякра вырнаçнă ял тăрăхĕсенче пурĕ 100 фельдшерпа акушер пункчĕ хута кайрĕ, пирĕн районта вара - 6. Малашлăхра тата республикăра 50 фельдшерпа акушер пункчĕ çĕклесе лартма тĕллев лартнă, районта вара Ачкассинче тата Березовка ялĕсенче фельдшерпа акушер пункчĕсем тума палăртнă.
"Ял тăрăхĕсене тирпей-илем кỹрсе аталантарас ĕç малалла та активлă пурнăçланĕ. Ял çыннисен хăйсем çине власть органĕсенче тăрăшакансем тимлĕх уйăрнине туймалла", - тенĕ маларах асăннă тĕлпулура республика Пуçлăхĕ.
Ялсенче 50 çул каялла тунă клубсем ытларах, вĕсем кивелнине, хальхи пурнăç шайне тивĕçтерменнине пула тата ял халăхĕ ыйтнине тĕпе хурса йышăннă та республика Пуçлăхĕ асăннă Указа. Унта палăртнă тăрăх, ялсенчи культурăпа кану центрĕсем 2016-2018 çулсенче хута каймалла. Шанас килет, пирĕн патра та ял клубĕсем республикăри тĕрлĕ конкурссене хутшăнса çĕнелеççĕ пулин те, асăннă Указ пирĕн районта та йĕр хăварсан тем пекехчĕ...
Алина ОРИНОВА.