06 ноября 2015 г.
Çак кунсенче ялхуçалăх ĕçченĕсем, тирпейлекен промышленноçра вăй хуракансем хăйсен професси уявне паллă турĕç. Ялхуçалăхĕпе çыхăннă уяв пирĕншĕн чуна çывăх уявсенчен пĕри. Мĕншĕн тесен эпир пурте тенĕ пекех ялтан тухнă, пурте сĕтел çинчи кăпăшка çăкăр, паха сĕт, аш-какай мĕнле пулнине пĕлетпĕр... Çак ырлăх çĕр ĕçченĕ кунĕн-çĕрĕн вăй хунипе пулать. Çавăнпа ялхуçалăхĕнче тăрăшакан чыспа мухтава тивĕçлĕ.
Ноябрĕн 3-мĕшĕнче ялхуçалăх ĕçченĕсем хăйсен професси уявне паллă тума районти Культура çуртĕнче пухăнчĕç. Уява пухăннисем ял тăрăхĕсенче предприятисем туса кăларакан ялхуçалăх таварĕсен ку-равĕпе паллашрĕç, унтан вĕсене пысăк залра Пантьăк ял тăрăхĕнчи "Сăр таппи" фольклор ушкăнĕ чăвашсен юрри-ташшипе саламларĕ.
Район администрацийĕн ялхуçалăх пайĕн начальникĕ Владимир Храмов ĕç пĕтĕмлетĕвĕпе паллаштарчĕ. Кăçалхи тăхăр уйăхра районăн ялхуçалăх аталанăвĕнче лайăх динамика упранса юлнине палăртрĕ. Палăртнă тапхăрта районти ялхуçалăх отрасльне аталантарма 38 миллион ытла тенкĕ патшалăх пулăшăвĕ кĕнĕ, вăл шутран 28 миллион тенкĕ - федераллă бюджетран. Ял ĕçченĕсем тĕрлĕ йывăрлăхсене пăх-масăр ỹсен-тăран тата выльăх-чĕрлĕх отраслĕсенче çитĕнỹсем тунине пĕлтерчĕ. Тăхăр уйăхра пур категориллĕ хуçалăх туса илнĕ продукци калăпăшĕ укçа çине куçарсан 850 млн тенкĕпе танлашнă, вăл шутра ялхуçалăх предприятийĕсем - 215 миллион тенкĕ. Продукци сутнинчен тата пулăшу панинчен 140 млн тенкĕ тупăш илнĕ, çакă иртнĕ çулхипе танлаштарсан 124 процент. Ялхуçалăх предприятийĕсенче ĕçлекенсен ĕç укçи вăтамран 15 пин ытла тенкĕпе (127 процент) танлашать. Хăш-пĕр хуçалăхсен ĕç укçи калăпăшĕ районăн вăтам шайĕнчен те пысăк. Сăмахран, "Коминтерн" ЯХПК-ра ĕç укçи вăтамран 20 пин тенкĕрен те иртет. Хисеплĕ çĕр ĕçченĕсене çак кун професси уявĕпе ЧР Патшалăх Канашĕн депутачĕ Николай Малов, ЧР Тĕрĕслевпе шутлав палатин председателĕ Татьяна Минина, Чăвашпотребсоюз правленийĕн ертỹçин çумĕ Андрей Данилов, район администрацийĕн пуçлăхĕ Александр Башкиров ăшшăн саламларĕç. Вĕсем ял хуçалăхĕнче тата продукци тирпейлекен промыш-ленноçра ĕçлекенсене, нумай çул ырми-канми тăрăшакансене, çитĕнỹ тунисене тĕрлĕ шайри наградăсем парса чысларĕç.
Хĕрлĕчутайсем хăйсен ĕççын-нисемпе чăннипех мăнаçланма пултараççĕ. Акă савăнăçлă уявра Николай Малов Чăваш Республикин Пуçлăхĕн Указĕпе Н.Лисаевăн хресченпе фермер хуçалăхĕн-че ĕçлекен Георгий Судакова "Чăваш Республикин тава тивĕçлĕ механизаторĕ" хисеплĕ ят парса чысланине пĕлтернĕ май кăкри çине ятарлă паллă çакса ячĕ. Пысăк чыса - Раççей Федерацийĕн Ялхуçалăх министерствин Тав Çырăвне - агропромышленность комплексĕн тытăмĕнче нумай çул тỹрĕ кăмăлпа ĕçленĕшĕн Николай Лисаев фермер тата райадминистрацин ялхуçалăх пайĕн начальникĕ Владимир Храмов та тивĕçлĕ пулчĕç. Николай Лисаевăн хресченпе фермер хуçалăхĕн-че ĕçлекен Нина Богаткина бухгалтер, Владимир Кальматкин тракторист, "Авангард" ТЯО-ри Геннадий Горланов таркторист, çак хуçалăхăн бухгалтерĕ Галина Седова, "Аккозинское" ЯХПК-н тракторисчĕ Вячеслав Кудряшов агропромышленность комплексне пысăк тỹпе хывнăшăн Чăваш Республикин Ялхуçалăх министерствин Хисеп грамотине тивĕçрĕç. "Единая Россия" партин регионти уйрăмĕн Тав çырăвĕпе райадминистрацин ялхуçалăх пайĕн начальникне Владимир Храмова, Виктор Устинов хресченпе фермер хуçалăхĕн пуçлăхне, "Нива" ЯХПК-н ветеринари фельдшерне Наталья Ивантаевана, çак хуçалăхăн тĕп агрономне Алексей Воронова наградăларĕç. "Единая Россия" партин регионти уйрăмĕн Тав çырăвне çавăн пекех суйлав кампанине ирттерме хастар хутшăннăшăн Атнар ял тăрăхĕ те тивĕçрĕ.
Çулленех Николай Малов депутат районти тĕрлĕ сферăра ĕçлекенсене премипе хавхалантарасси йăлана кĕчĕ ĕнтĕ. Нумаях пулмасть унăн хавхалантарăвне культура тата вĕренỹ сферисенче ĕçлекенсем тивĕç- нĕччĕ. Ку чысран агропромышленноçра тăрăшакансем те аякра тăрса юлмарĕç. Уявра депутат аллинчен "Коминтерн" ЯХПК-ри Илья Пономарев тракторист, Владимир Романов водитель, Николай Бардасов сысна пăхакан, Мария Князева выльăх пăхакан, "Нива" ЯХПК-ри Эльвира Ямскова доярка преми илчĕç. Килти хушма хуçалăхра туса илнĕ продукцие патшалăха сутакансен те сцена çине хăпарма тиврĕ. Акă, Арайкассинчи Сергей Шатаев хушма хуçалăхĕ ялхуçалăх продукцийĕ нумай сутать. Çакăншăн кил хуçи Раççей Центросоюзĕн Дипломне илчĕ. Райпо хăй те наградăсăр юлмарĕ, вăл потребкоопераци ĕçченĕсене информаципе тивĕçтерсе тăнăшăн Центросоюз Издательство Çурчĕн тата "Кĕр парнисем" уйăхлăха хутшăнса Шупашкар хулине ялхуçалăх продукчĕсемпе тивĕçтернĕшĕн Чăвашпотребсоюзăн Тав çырăвĕсене тивĕçрĕ.
Райпо вара хăйĕнпе тачă çыхăнса тухăçлă ĕçлекен "Аккозинское" ЯХПК-натата В.Комаров фермера сертификат пачĕ. Уяв вăхăтĕнче тĕрлĕ наградăсене тивĕçнисем нумаййăн пулчĕç. Ĕç ăмăртăвĕнче мала тухнă выльăх-чĕрлĕх пăхакансем, тыр-пул ỹстерсе илекенсем район администрацийĕн Хисеп грамотине тата премие тивĕçрĕç. Юлашкинчен ял ĕçченĕсем ветерансен хорĕ юрланă юрăсене, "Асамлă чаршав" фестивальти спектакальсен интереслĕ сыпăкĕсене курса савăнчĕç. А.ЗАМУТКИНА.
Источник: "Пирěн пурнăç"