06 ноября 2015 г.
Пирĕн районта пурăнакансем театра кăмăлланине ноябрĕн 2-мĕшĕнче тепĕр хут курса ĕнентĕм. Шăпах çавăн чухне савăнăçлă лару-тăрура хупрĕç те пĕр уйăх хушши пынă "Асамлă чаршав" фестивале - хамăр тăрăхра çуралса ỹснĕ, Константин Иванов ячĕпе хисепленекен Чăваш патшалăх академи драма театрĕнче вылянă, пурнăçран вăхăтсăр уйрăлса кайнă Ирина Садовниковапа Николай Булаткина халалланă пултарулăх конкурсне.
Кăçал "Асамлă чаршав" фестиваль улттăмĕш хут иртрĕ. Унта пур ял тăрăхĕнчи театр пултарулăх ушкăнĕсем те хутшăнчĕç. Паллах, жюрие чи лайăх спектакле палăртма çăмăл пулмарĕ. Çавăнпах пулĕ пĕрремĕш вырăн никама та тивĕçмерĕ. Иккĕмĕш вырăна Мишеркассинчи ("Улькка инкен виçĕ кинĕ" спектакль) тата Туктамăш ялĕнчи ("Кăвак сирень айĕнче" спектакль) Культура çурчĕсен коллективĕсем тивĕçрĕç. Виççĕмĕш вырăна Серенкассинчи ("Лар, аннеçĕм, юнашар" спектакль) тата Питĕркассинчи ("Мыскарасăр туй пулмасть" спектакль) Культура çурчĕсем пайларĕç. "Чи лайăх хĕрарăм ролĕ" номинацие Туктамăшри Культура çурчĕн коллективĕ лартнă спектакльте Кулине рольне калăпланă Лилия Миронова тивĕçрĕ.
"Чи лайăх арçын ролĕ" номинацире Мишеркассинчи Культура çурчĕн коллективĕ лартнă спектакльте Миша рольне вылянă Николай Лисаев çĕнтерчĕ. "Эпизодри чи лайăх роль" номинацире Анастасия Картмасова палăрчĕ (питĕркассисем лартнă "Мыскарасăр туй пулмасть" спектакльти Тоня ролĕшĕн). Районти пултаруллă артистсене Шупашкарти пысăк сцена маçтăрĕсем - Чăваш патшалăх академи драма театрĕн артисчĕсем саламларĕç. Театр директорĕ Вадим Ефимов çĕнтерỹçĕсене хăйсем патне спектакль пырса курма йыхрав хучĕсем парнелерĕ. Петр Садовников артист вара хĕрлĕчутайсене Ирина Садовниковапа Николай Булаткина манманшăн, вĕсен ячĕпе çулсеренех "Асамлă чаршав" фестиваль ирттернĕшĕн тав турĕ.
Хĕрлĕ Чутайри Культура çуртне фестивале пĕтĕмлетнĕ çĕре куракансем чылай пухăннăччĕ. Вĕсем сцена çине тĕрлĕ спектакльсен сыпăкĕсемпе тухнă вырăнти артистсене те, драма театрĕн артисчĕсене те тăвăллăн алă çупса тав турĕç. А.КАРПОВА.
Источник: "Пирěн пурнăç"