13 ноября 2015 г.
Раççей ДОСААФ-ĕн Хĕрлĕ Чутайри уйрăмĕнче ĕçлекен Юрий Егорова пĕлмен çын районта сахал пуль, уйрăмах ăна водительсем лайăх паллаççĕ. 10 çул ĕнтĕ вăл кунти уйрăмра пулас водительсене машинăпа çỹреме хăнăхтарать. Унччен вăл районти тĕрлĕ предприятисенче вăй хунă. Пĕтĕмĕшле ĕç стажĕ 30 çула яхăн. Тỹрĕ кăмăлпа нумай çул хушши тăрăшса ĕçленĕшĕн Юрий Владимирович нумаях пулмасть Республика Пуçлăхĕн Тав сăмахне тивĕçрĕ. Сăмах май, Юрий Владимирович кăçал январь уйăхĕнче 50 çул тултарнă. Хăй вăхăтĕнче вăл Питĕр-кассинчи сакăр çул вĕренмелли шкултан вĕренсе тухнă, унтан Çĕмĕрлери 10-мĕш профтехучилищĕ-ре, ДОСААФ-ра водителе вĕреннĕ, 1983 çулта Совет Çарĕн ретне тăнă. Салтак тивĕçне Юрий Егоров Афганистанра, Кабул хулинчи 180-мĕш полкăн авторотинче пурнăçланă. 1986 çулхи февраль уйăхĕнче тăван яла таврăннă. Юрий Егоров Афганистан вăрçинче пулнă воин-интернационалист, районти ветерансенчен пĕри. Район çамрăкĕсене патриотизмла воспитани парас тĕлĕшре нумай вăй хурать.
А.ЗАМУТКИНА.
Источник: "Пирěн пурнăç"