13 ноября 2015 г.
Районта çулсеренех "Пирĕн пурнăç" парнисемшĕн иртекен çăмăл атлетика эстафетине кăçал чылай çемье хутшăнчĕ. Вĕсем икĕ ушкăна пайланса ăмăртрĕç: аслисем тата 7 çула çитмен ача; аслисем тата 13 çула çитмен ача. Çичĕ çула çитмен ачаллă çемьесем хушшинче чи малтан финиша Яманкассинче пурăнакан Алексеевсем çитрĕç. Галина Валериевна Алексеева Çĕн Атикассинчи вăтам шкулта пуçламăш классене вĕрентет, Михаил Степанович çакăнтах хуралçăра тимлет. Ашшĕпе амăшĕ ултă çулхи Артура пĕчĕклех спорта явăçтарни савăнтарать. Эстафетăра иккĕмĕш вырăна тухнă Питĕркассинчи Герасимовсен çемйи те спортпа туслă. "Хастар" спорткомплекс тренерĕ Владимир Валентинович Герасимов старта Екатерина хĕрĕпе тата 5 çулхи Егор мăнукĕпе тухрĕ. Çемьесем хушшинчи чупура виççĕмĕш вырăна тухнă Матюшкинсен Максим ывăлĕ вара эстафетăна хутшăннисенчен чи çамрăкки пулчĕ - вăл тăватă çулта кăна. Апла пулин те Максим тăрăшсах чупрĕ, амăшĕн, Светлана Валерьевнăн, аллинчен эстафета патаккине илсен финиша çил пек ыткăнчĕ. Район администрацийĕн право ĕçĕсен секторĕнче ертсе пыракан эксперт специалистра тăрăшакан Алексей Леонидович Матюшкин мăшăрĕпе ывăлне хавхалантарни вĕсене старта ăнăçлă вĕçлеме пулăшрĕ. 13 çула çитмен ачаллă çемьесенчен вара эстафетăра пĕрремĕш вырăна Калкассинчи Катюковсем, иккĕмĕшне çак ялти Алексеевсем, виççĕмĕшне Мăн Этменти Захаровсем тухрĕç. Палăртмалла, асăннă эстафетăра малти вырăнсене йышăннă пур çемье те 2016 çулăн пĕрремĕш çур çулĕнче "Пирĕн пурнăç" район хаçатне тỹлевсĕрех илсе тăрĕ. А.ТИМОФЕЕВА.
Источник: "Пирěн пурнăç"