18 ноября 2015 г.
Райадминистрацин ялхуçалăх пайĕн начальникĕ Владимир Храмов ялхуçалăхĕн тата тирпейлекен промышленность ĕçченĕн кăçалхи професси уявĕн-че çỹллĕ шайри наградăна тивĕçнисенчен пĕри пулчĕ. Владимир Викторович агропромышленность комплексĕн тытăмĕнче нумай çул тỹрĕ кăмăлпа ĕçленĕшĕн Раççей Федерацийĕн Ялхуçалăх министерствин Тав çырăвне тивĕçрĕ. Владимир Храмов çамрăк чух Вăрнарти совхоз-техникумра вĕреннĕ. Унтан çĕршыв умĕнчи çар тивĕçне пурнăçланă хыççăн тăван колхозра комплекс бригади- рĕнче ĕçлеме пуçланă. Каярахпа вăл Шупашкарти пир-авăр комбиначĕн районти хушма хуçалăхĕнче, "Хĕрлĕ Чутайри агропромхими" пĕрлешỹре, "Четайское" предприятире, "Коминтерн" ЯХПК-ра, "Асамат", "Телей" ялхуçалăх пĕрлешĕвĕсенче тĕп агрономра вăй хунă. Ĕçленĕ хушăрах Чăваш патшалăх ялхуçалăх институтĕнче аслă пĕлỹ илнĕ. 2009 çултанпа вăл район администрацийĕн ялхуçалăх пайĕнче тăрăшать: малтанах - агрономра, район администрацийĕн пуçлăхĕн пĕрремĕш çумĕнче - экономикăпа ялхуçалăх пайĕн начальникĕнче, тăватă çул ытла ĕнтĕ ялхуçалăх пайне ертсе пырать. Владимир Викторович агропромышленность тытăмĕнче ĕçленĕ хушăра ялхуçалăх аталанăвне тỹпе хывнăшăн тĕрлĕ наградăсене сахал мар тивĕçнĕ. Вĕсенчен чи сумлисем - ЧР Ялхуçалăх министерствин (2004 çул), Чăваш Патшалăх Канашĕн (2013 çул) Хисеп грамотисем, нумаях пулмасть алла тыттарнă Тав çырăвĕ те. А.ДМИТРИЕВА.
Источник: "Пирěн пурнăç"