20 ноября 2015 г.
Çĕнĕ йышши ют çĕршыв паспортне мĕншĕн тумалла? Çак ыйту чылай граждана интереслентерет. Калас пулать, çĕнĕ йышши ют çĕр-шыв паспорчĕ пилĕк çуллăха параканнипе танлаштарсан самай лайăхрах. Унăн ĕçлемелли срокне тăснă. Çавăнпа та Миграци службин уйрăмĕсене сахалрах каймалла пулать. Çĕнĕ ют çĕршыв паспортĕнче страницăсен шучĕ те нумайрах. Çакă ют çĕршыва тăтăшах каякансемшĕн меллĕ. Унăн пĕрремĕш пластик страницинчи информацие лазер гравировкин технологийĕпе усă курса ỹкернĕ. Таможня витĕр тухнă чухне паспорт çинчи информацие ятарлă хатĕр вулать. Унти даннăйсене хỹтĕленĕ, шифрпа çырнă. Асăннă документа пач та суя тума пулмасть.
Асаилтеретĕп, Евросоюзăн консул учрежденийĕсем çĕнĕ ют çĕршыв паспорчĕсемпе ĕçлеме кăмăллаççĕ. Хăш-пĕр ют патшалăхсем граждансене çĕннисемпе кăна йышăнаççĕ. Тĕслĕхрен, Сауд Аравийĕн Королевстви. Хăш-пĕр çынсем "кивĕ" ют çĕршыв паспорчĕ йỹнĕрех тесе шухăшлаççĕ. Паянхи кун ăна илес тесен 2000 тенкĕ тỹлемелле. Анчах та вăхăт иртсен, тăватă çул çурăран, ăна каллех тутарттарас пулать. Вăл вăхăталла патшалăх пошлини те ỹсĕ. Çĕнĕ ют çĕршыв паспортне тутарттарас пулсан халĕ 3500 тенкĕ тỹлемелле. Унпа 10 çул хушши усă курма юрать. Çĕнĕ ют çĕршыв паспортне илес тесен заявлени çырмалла. Заявленисене çак адреспа йышăнаççĕ: Шупашкар хули, К.Маркс урамĕ, 37А çурт. Çавăн пекех вĕсене Миграци службин Етĕрнери уйрăмĕнче йышăнаççĕ: Етĕрне хули, Октябĕре 50 çул урам, 71А çурт.
Елена ШОРНИКОВА, Федераллă Миграци службин районти уйрăмĕн тĕп эксперт специалисчĕ.
Источник: "Пирěн пурнăç"