25 ноября 2015 г.
Чăваш наци конгресĕн районти уйрăмĕ пуçарнипе районта "Чи пултаруллă асанне-2015" конкурс иртет. Ноябрĕн 20-мĕшĕнче Сĕнтĕкçырминчи Культура çуртĕнче конкурсăн пĕрремĕш тапхăрĕ пулчĕ, унта Хусанушкăнь, Кив Атикасси, Штанаш ял тăрăхĕнче пурăнакан асанне-кукамайсем хутшăнчĕç.
Виçĕ асанне хăйсем ташă-юрăра маттур пулнине, чăваш апатне пĕçерме те, мăнукĕсемпе пĕр чĕлхе тупма, вĕсене сăпка юррипе çывратса яма, юмах каласа кăсăклантарма пултарнине те кăтартса пачĕç. Вĕсен мăнукĕсем те аслисенчен кая юлмарĕç, чăваш юррисене шăрантарчĕç, сăвă каларĕç.
Жюри йышăнăвĕпе, конкурса хутшăннă асаннесенчен Кив Атикасси ял тăрăхĕнчи Алефтина Николаевна Кушманова "Ылтăн алăллă асанне" номинацире палăрчĕ. Штанаш ял тăрăхĕнчи Светлана Геннадьевна Соловьева "Куракансен кăмăлне кайнă асанне" ята тивĕçрĕ. Хусанушкăнь ял тăрăхĕнчи Елена Валериановна Кириллова вара "Чи пултаруллă асанне" номинацире çĕнтерчĕ.
Çапла майпа икĕ асанне - Елена Кирилловапа Светлана Соловьева - асăннă конкурсăн ноябрĕн 30-мĕшĕнче иртекен районти тапхăрне хутшăнса Хĕрлĕ Чутай районĕнчи "Чи пултаруллă асанне-2015" ята тивĕçессишĕн тупăшĕç. Унччен вара, ноябрĕн 25-мĕшĕнче, пултаруллă асаннесен конкурсĕн иккĕмĕш тапхăрĕ пулĕ, вăл Тралькасси ял тăрăхĕнче иртĕ, унта Хĕрлĕ Чутай, Ачкасси, Атнар, Тралькасси, Пантьăк, Мăн Этмен, Питĕркасси ял тăрăхĕсенчи асаннесем хутшăнĕç.
А.КАРПОВА.