25 ноября 2015 г.
Потребсоюзсен хушшинчи Пĕтĕм Раççĕйри ăмăртăва пĕтĕмлетнине хаçатра пĕлтернĕччĕ. Асăннă ăмăртура Чăвашпотребсоюз кăçалхи виççĕмĕш кварталта потребкоопераци тытăмĕнчи пĕтĕмĕшле ĕç-хĕле аталантарнăшăн Раççей шайĕнче тата Атăлçи федераци округĕнче пĕрремĕш вырăн йышăннă.
- Ку çĕнтерỹре потребкооперацинче тăрăшакан кашни ĕçченĕн тỹпи пур, çак йышра Хĕрлĕ Чутай райповĕн коллективĕ те. Ĕçченсен пысăк ăсталăхне пула тата пĕтĕм вăй-хала шеллемесĕр тăрăшнипе паянхи çăмăл мар экономика условийĕсенче ĕç кăтартăвĕсене пысăклатма пултартăмăр, Чăваш Республикинчи потреб-коопераци тытăмĕ вăйлине кăтартрăмăр.
Александр Юрьевич, Сире тата райпо коллективне ырă ĕçĕршĕн, потребитель кооперацине аталанма тỹпе хывнăшăн тав тăватăп, - çак сăмахсемпе палăртса саламланă райпо Канашĕн председательне А.Ю.Степанова Чăвашпотребсоюз Канашĕн председателĕ, пирĕн тата Чăваш патшалăх Канашĕн депутачĕ В.М.Павлов.
Нумаях пулмасть Чăвашпотребсоюз кăçалхи 3-мĕш кварталти ĕç- хĕле пĕтĕмлетрĕ. Ку хутĕнче те пирĕн райпо чылай хаклава тивĕçрĕ. Хĕрлĕ Чутай райповĕ производствăна аталантарнăшăн тата сĕте сутăн илессипе пĕрремĕш вырăнсем йышăнса Диплома тивĕçнĕ, иккĕмĕш вырăнта - эмел курăкĕсене туянассипе тата кондитер изделийĕсем туса кăларассипе, виççĕмĕш вырăнта - пахча çимĕç туяннипе, полуфабрикатсем тăвассипе тата çăкăр пĕçерессипе. Сăмах май, райпо Канашĕн председателĕ А.Ю.Степанов пĕлтернĕ тăрăх, райпо ĕçченĕсем кăçалхи январь-октябрь уйăхĕсенче 32 млн ытла тенкĕлĕх апат-çимĕç пĕçерсе сутнă, çăкăр-кулач тата кондитер изделийĕсене 760 тонна ытла пĕçерсе кăларнă, тăварласа-техĕмлентерсе вĕсем 2 млн та 352 пин тенкĕ туса илнĕ, 9 млн ытла тенкĕлĕх консервланă продукци сутнă тата ытти те.
- Райпо ĕçченĕсем туса кăларнă продукци районта кăна сутăнмасть. Пирĕн тавара Çĕмĕрле, Шупашкар, Çĕнĕ Шупашкар хулисемпе районĕсенче те, Чулхула облаçĕпе Мари Республикинче те туянма май пур. Çавăн пекех пирĕн томатпа хурăн сĕткенне мускавсем те питĕ килĕштереççĕ, - кĕскен пĕлтерчĕ Александр Юрьевич.
Кăçал Чăвашпотребсоюз 95 çул тултарчĕ. Çак ятпа тата нумай çул потребитель кооперацийĕнче тỹрĕ кăмăлпа ĕçленĕшĕн Раççей Федерацийĕн Центросоюз Канашĕн председателĕ Е.Н.Кузнецов Хĕрлĕ Чутай райпо Канашĕн председательне А.Ю.Степанова Хисеп грамотипе наградăланă.
А.САН.