27 ноября 2015 г.
Турă çут тĕнче илемлĕрех пултăр тесе хĕрарăма хĕр парнелет, тет. Пирĕн çемьене вара аист пилĕк хутчен хĕрпĕрчи илсе килчĕ. Паллах, çăмăл пулмарĕ пире ачасене ура çине тăратма. Пĕрин хыççăн теприне вĕрентме, ай, мĕнле йывăр. Пур йывăрлăха та çĕнтерме вара çывăх çынсен хавхалантарăвĕ, вĕсем пулăшса тăни кирлех. Мăшăрăмпа иксĕмĕр ачасене тивĕçлĕ воспитани пама пултартăмăр, алла килĕшекен професси илме пулăшрăмăр. Хăйсем те анне пулнă ĕнтĕ, мана пилĕк хутчен кукамай тунă. Вĕсем халĕ çĕршывăн тĕрлĕ кĕтессинче пурăнаççĕ.
Асли, Эля, Шупашкарти медицина колледжне пĕтернĕ хыççăн Патăрьел районĕнчи психикăпа неврологи интернатĕнче медицина сестринче вăй хурать. Оля та ун йĕрĕпе кайрĕ, ун хыççăн çыхăну йĕркелекен ятарлă çар (прапорщиксен) шкулне пĕтерчĕ, Етĕрне районĕн çар комиссариачĕн призывĕн иккĕмĕш уйрăмĕнче фельдшерта тăрăшрĕ. Унтан ăна Раççей çар службине илчĕç. Комсомольски районĕн çар комиссариатĕнче те службăра тăчĕ вăл. Психологи факультетĕнче куçăмсăр майпа вĕренсе алла диплом та илчĕ. Паянхи кун Оля Раççейпе Казахстан чиккинче службăра тăрать. Унччен вăл пилĕк çула яхăн Раççейĕн çурçĕр чиккисене сыхланă. Дина хĕрĕм И.Я.Яковлев ячĕллĕ Чăваш патшалăх педагогика университетĕнче истори факультетне пĕтерчĕ. Вăл К.В.Иванов ячĕллĕ Чăваш патшалăх драма театрĕнче ĕçлет. Надежда хĕрĕм те медицина колледжне хĕрлĕ дипломпа пĕтерчĕ. Халĕ вăл республикăри кардеологи диспансерĕн реанимаци уйрăмĕнче медицина сестринче тăрăшать. Валя хĕрĕм И.Н.Ульянов ячĕллĕ Чăваш патшалăх университечĕн медицина факультетне пĕтерчĕ, иккĕмĕш çул ĕнтĕ республикăри онкологи диспасерĕнче ординатура тухать. Унăн специальноçĕ - врач-онколог.
Хам чылай çул хушши вĕренỹ сферинче тăрăшрăм, информаципе методика центрĕн заведующийĕнче вăй хутăм, ĕçе юратсах утрăм. 2010 çулта тивĕçлĕ канăва тухрăм. Анчах чун ачасем патне туртнипе ĕçсĕр лараймарăм, "Пилеш" ача садĕнче воспитательте тăрăшрăм, унтан Питĕркасси шкулĕнче кĕçĕн классене вĕрентрĕм. Пĕтĕмĕшле педагогика стажĕ 35 çула çитрĕ.
Хĕрĕмсенчен пĕрине те пулин хам çулпа ярас темерĕм. Кун-çулне хăйсем кăмăлланă ĕçпе çыхăнтарччăр терĕм. Эпĕ вĕсене çавăн пек йышăну тунăшăн мухтатăп кăна. Ачасем пурнăçра хăйсен вырăнне тупнă, çĕршыва юрăхлă çын пулнă-тăк ашшĕ-амăшĕ те телейлĕ. Вĕсен çитĕнĕвĕ - пирĕн çитĕнỹ.
Альбина ПИГИЛЬДИНА, Хирлỹкасси ялĕ, пилĕк ача амăшĕ.