27 ноября 2015 г.
Çак кунсенче районти ЗАГС пайĕнче пулса кăçалхи тĕрлĕ кăтартусемпе паллашма май килчĕ. Паянхи кăларăмра районта ача çуралас енĕпе лару-тăру еплерех пулни пирки сăмах хускатăпăр.
ЗАГС пайĕн заведующийĕ Елена Барышникова пĕлтернĕ тăрăх, ноябрĕн 27-мĕшĕ тĕлне районта 123 ача çуралнине регистрациленĕ. Пĕлтĕр ку вăхăтра 16 ача ытларах кун çути курнă. 2014 çулта çут тĕнчене арçын ачасем ытларах килнĕ пулсан (78; 2015 ç. - 59), кăçал хĕрачасем нумайрах (64; 2014 ç. - 61).
Пĕлтĕр те, кăçал та пĕрер йĕкĕреш кун çути курнă. Çемьесенче миçемĕш ача çуралнине тишкерсен çакă курăнать: 2015 çулта 44 çемьере пĕрремĕш ача çуралнă (иртнĕ çул - 64), иккĕмĕш - 47 (42), виççĕмĕш - 24 (27), тăваттăмĕш - 5 (4), пиллĕк-мĕш - 2 (2), улттăмĕш - 1 (пĕлтĕр пулман).
18 çул тултарманнисем кăçал виççĕн ача амăшĕ пулнă, 2014 çулта - 1. Çап-çамрăк аннесем йыш-лансах пыраççĕ пулас. Ача çуратнă пĕччен амăшĕсен хисепĕ вара сахалланнă: пĕлтĕрхи кăтарту 35 пулнă-тăк, кăçалхи - 16.
ЗАГС пайĕн заведующине Елена Барышникована хăш-пĕр ашшĕ-амăшĕ ача çуралнине вăхăтра регистрацилеме васкаманни пăшăрхантарать. Çак ĕçе ахаль те уйăх хушшинче пурнăçлама ирĕк панă. Апла пулин те ку вăхăт та çителĕксĕр пулас хăшĕсемшĕн. Кăçал та, иртнĕ çул та кун пек пĕрер тĕслĕх пулнă.
Анлă сарăлнă ятсем пирки пĕр-ик сăмах. Анастасийăпа Даниил ятсем юлашки икĕ çулĕнче те малти вырăна çирĕп тытса пыраççĕ. Кунсăр пуçне районта пурăнакан ашшĕ-амăшĕ пĕлтĕр Дарья, Ангелина тата Артемпа Никита ятсене килĕштерни сисĕнет. Кăçал вара Екатерина, Виктория тата Максимпа Кирилл ятсем анлă сарăлнă.
Н.ПЕТРОВА.