02 декабря 2015 г.
Район прокуратури тĕрĕслевпе райпон 1 № гастрономĕнче пулчĕ, ача-пăча апачĕн хакне пысăклатса сутнине тупса палăртрĕ. Чăваш Республикин Министрсен Кабинечĕн йышăнăвĕн 2-мĕш пункчĕпе килĕшỹллĕн, ертсе пыракан субъектсен ача-пăча апачĕн (вăл шутра апат-çимĕç концентрачĕсем те) хакне çапларах хăпартса сутма ирĕк пур: хуласенче - 30 процент, яллă вырăнсенче - 35 процент. Патшалăх стандарчĕ çирĕплетнĕ тăрăх, ача-пăча апачĕсем шутне 14 çул тултарманнисен апат-çимĕçĕ кĕрет. Тĕрĕслев асăннă лавккара "Любимый" тата "Фруктовый сад" нектарсен 13 тутăллă тĕсне (калăпăшĕ 0,2 литртан пуçласа1,93 литр таран) палăртнă виçерен хăпартса сутнине кăтартрĕ: 37,7 процентран пуçласа 41,7 процент таран. Çавăн пекех кондитер продукчĕсене те палăртнинчен пысăкрах хакпа сутни паллă пулчĕ. Тĕрĕслев пĕтĕмлетĕвĕсемпе район прокуратури райпо председательне представлени тăратрĕ, хаксене саккунпа килĕшỹллĕн йĕркене кĕртме хушрĕ.
Сергей ДАНИЛОВ, район прокурорĕн тивĕçĕсене пурнăçлаканĕ.
Источник: "Пирěн пурнăç"