04 декабря 2015 г.
Хĕрлĕ Чутай салин Ленин урамĕнче ача сачĕн çурчĕ кăçал темиçе уйăх хушшинчех "хăпарса ларчĕ". Çурт аякранах мăнаçлăн та хитрен курăнса ларать. Кун пек капмар вĕренỹ заведенийĕ районта çук-ха тесе çирĕп- пĕнех калама пулать. Асăннă объекта туса пĕтермелли вăхăт нумай юлмарĕ, муниципаллă контрактпа ĕçсене кăçалхи декабрĕн 25-мĕшĕнче вĕçлемелле. Çавна пулах район администрацийĕн ларусем ирттермелли Пĕчĕк залĕнче канашлу иртрĕ. Канашлура ача садне тĕплĕн туса пĕтермелли самантсемпе çыхăннă ыйтусем тавра калаçрĕç, ыйтăвĕ-семпе ĕçĕсем вара чылай. Малтанах ача садне "Шевле" ят памалла тесе палăртнăччĕ, паян вара "Солнышко" ача сачĕн иккĕмĕш корпусĕ пирки калаçу пырать. Çавăн пекех ача садне валли чỹрече каррисем, кавирсем, спорт инвентарĕ илме укçа-тенкĕ ыйтăвĕсене те татса памалла.
Игорь НИКОЛАЕВ, "Волгаресурс" тулли мар яваплă обществăн прорабĕ:
- Декабрĕн 25-мĕшĕ тĕлне ача садне туса пĕтерессишĕн куллен пирĕн 5-6 бригада ĕçлет. Урай сарас ĕçе вĕçлерĕмĕр, çак эрнере плиткăсене хурса пĕтересшĕн, çутă ламписене лартасшăн, пĕрремĕш хутăн стенисене сăрлама пуçлатпăр, иккĕмĕш хутăн стенисене хальлĕхе типĕтетпĕр, кайран шпаклевка тумалла...
Татьяна ШЕРЕМЕТЬЕВА, райадминистрацин вĕренỹ пайĕн начальникĕн тивĕçĕсене пурнăçлаканĕ:
- Паян районта шкул çулне çитмен ачасем валли ача сачĕ-сенче вырăнсем çитмеççĕ. Çавна пулах çĕнĕ ача сачĕ хута каять. Ача садне 160 ача çỹреме пуçлĕ, 8 ушкăн пулĕ. Çапла вара çитес çултан ача садне çỹрес кăмăллисен черечĕ самай кĕскелĕ. Кадр енĕпе ĕçсем пыраççĕ: аслă пĕлỹллĕ воспитательсем çеç ĕçлеме пултарĕç, çĕнĕ ача сачĕн заведующийĕ кам пуласси те паллă.
Алина Оринова.
Источник: "Пирěн пурнăç"