09 декабря 2015 г.
Районта юлашки çулсенче темиçе микрорайон йĕркеленнĕ. Вĕсенчен пĕри - Енкĕлт ялĕ çывăхĕнчи Придорожная урам, пĕрремĕш çуртсене кунта 2000-мĕш çулсем пуçламăшĕнчех хăпартма тытăннă. Çак урама Хĕрлĕ Чутай салинчен "Сура" автоçул кăна уйăрать, вăл район центрĕпе юнашарах пулин те кунта çутçанталăк газĕ хальччен пулман. Çавăнпа та нумайăшĕ хăйсен хальхи йышши хăтлă кил-çурчĕсене пурăнма куçма васкаман, пурăнма кĕнисем вара кил-çурта электроэнергипе ăшăтнă. Газификаци ыйтăвне татса парас тесе вĕсем Республика Пуçлăхĕ патне, район администрацине çырупа тухнă, газ кĕртес ĕçе хăвăртлатма ыйтнă. Кăçалхи сентябрĕн 10-мĕшĕнчен газовиксем урама газ пăрăхĕсем хума тытăннă.
Акă ĕнер Придорожная урамра пурăнакансем кĕтнĕ кун çитрĕ. Кăвак çулăма чĕртме район пуçлăхĕ Александр Степанов, район администрацийĕн пуçлăхĕн тивĕçĕсене вăхăтлăх пурнăçлакан Юрий Ямсков, "Газпром газораспределение Чебоксары" акционерлă обществăн Муркашри уйрăмĕн ертỹçи Решит Чебенов, районти газ участокĕн начальникĕ Валерий Орлов, газ участокĕн ĕçченĕсем тата Придорожная урам çыннисем пухăнчĕç.
Район пуçлăхĕ чи малтанах çутçанталăк ырлăхĕ урама çитнишĕн Чăваш Республикин Правительствине, газ кĕртес ĕçре вăй хуракансене тав тумаллине каларĕ. Александр Юрьевич урама газпа тивĕçтерес ĕçре активлă пулнăшăн "Газпром газораспределение Чебоксары" акционерлă обществăн генеральнăй директорне Кияметдин Мифтахутдинова тата Решит Чебенова Тав çырăвĕ парса чысларĕ. Тав сăмахне тата район администрацийĕн Хисеп грамотине районти газ участокĕнче вăй хуракансем - Владимир Орлов, Алексей Федоров, Герман Елгайкин, Евгений Иванов, Василий Абаськин, Михаил Николаев, Евгений Шуськин - тивĕçрĕç. Унтан çак урамри Наталья тата Юрий Ориновсен кил-çурчĕ тĕлĕнче кăвак çулăм чĕртрĕç. Çамрăк мăшăр çавăрнă кил-çурта кĕрсе çутçанталăк газĕ çитнине курса ĕненчĕç.
А.ЗАМУТКИНА.
Источник: "Пирěн пурнăç"