16 декабря 2015 г.
Район администрацийĕн пуçлăхне конкурс тăрăх суйлас тапхăр пырать. Ку енĕпе Чăваш Республикин Пуçлăхĕн 2015 çулхи декабрĕн 2-мĕшĕнчи 562-рг № хушăвĕпе килĕшỹллĕн 8 çынтан тăракан комисси туса хунă, вĕсем: Чăваш Республикин Тĕрĕслевпе шутлав палатин председателĕ Татьяна Дмитриевна Минина, Чăваш Патшалăх Канашĕн депутачĕсем Олег Алексеевич Николаевпа Валерий Михайлович Павлов, Чăваш Енри коммерциллĕ мар организаци президенчĕ Михаил Иванович Федотов тата район пуçлăхĕ Александр Юрьевич Степанов, район Пухăвĕн депутачĕсем Анатолий Васильевич Лукинпа Петр Иванович Пашкуртов, райадминистрацин йĕркелỹпе тĕрĕслев тата кадрсен секторĕн заведующийĕ Светлана Петровна Князькова. Асăннă комиссийĕн пĕрремĕш ларăвĕ иртнĕ, унта председательне, унăн çумне, секретарьне палăртнă. Комисси председателĕ - Т.Д.Минина, председателĕн çумĕ - А.Ю.Степанов, секретарĕ - С.П.Князькова. Комиссийĕн иккĕмĕш ларăвне декабрĕн 18-мĕшĕ хыççăн ирттерĕç. Конкурса документсене йышăнмалли юлашки кун - декабрĕн 18-мĕшĕ, унăн условийĕсем пирки хаçатра декабрĕн 4-мĕшĕнче çырса пĕлтернĕччĕ. Декабрĕн 24-мĕшĕнче 9 сехетре райадминистрацин ларусем ирттермелли Пĕчĕк залĕнче конкурса пĕтĕмлетĕç.
Источник: "Пирěн пурнăç"