23 декабря 2015 г.
Елена Ефимовнăпа Федор Петрович Ванягинсем Туканаш ялĕнче çуралса ỹснĕ, çакăнтах тĕпленнĕ. "Пĕрлешнĕ чухне анне çирĕмре, атте вунçиччĕре пулнă", - теççĕ ашшĕпе амăшĕ пирки ачисем. Çичĕ теçеткене яхăн пĕр- пĕрне килĕштерсе, çемье ăшшине упраса пурăнаççĕ Ванягинсем. Елена Ванягина декабрĕн 19-мĕшĕнче 90 çул тултарнă. Апла пулин те вăл вăр-варлăхне çухатман темелле, чиперех кăштăртатса çỹрет, хаçат та куçлăхсăрах вулать.
Паянхи кун вĕсем мăшăрĕпе иккĕшех пурăнаççĕ, анчах та виçĕ хĕрĕпе икĕ ывăлĕ, 11 мăнукĕпе 7 кĕçĕн мăнукĕ ватăсене манмаççĕ, килсех çỹреççĕ. Уйрăмах çемйипе Туканашрах тĕпленнĕ Борис ывăлĕ ашшĕ-амăшне тимлĕх уйăрсах тăрать. Галина кинĕ те хуняшшĕпе хунямăшĕ пирки ырă сăмах кăна калать. Елена Ефимовна ĕмĕрне колхозра ĕçлесе ирттернĕ. Тертлĕ вăрçă çулĕсенче вăл ыттисемпе танах ырми-канми вăй хунă. "16 çулта чухне Хватукасси патĕнче окоп та чавма тиврĕ, урара çăпатаччĕ", - аса илет халĕ нушаллă çамрăклăхне сумлă ватă. Вăрман ĕçлеме те çỹренĕ, пысăк пăчкăпа юмансем каснă. Кохозри çĕр ĕçĕсене те алăпах пурнăçланă. Федор Петрович та пурнăçне тăван хуçалăха халалланă, бригадирта, тимĕрçĕре вăй хунă. Ĕмĕрĕсене ĕçлесе ирттернĕ ватăсем халĕ те ĕçсĕр ларасшăн мар, чăх-чĕп усраççĕ, пыл хурчĕсем ĕрчетеççĕ.
90 çул тултарнă ятпа Елена Ефимовна Ванягина патне Раççей Президентĕнчен Владимир Путинран саламлă Çыру çитнĕ. Çавăн пекех вăл сумлă юбилей ячĕпе йышлă тăванĕсенчен те ăшă салам сăмахĕсем йышăннă.
А.КАРПОВА.
Источник: "Пирěн пурнăç"