30 декабря 2015 г.
Иртнĕ эрнере Мускавра Раççей Президенчĕ Владимир Путин Патшалăх Канашĕн çĕршыври пĕтĕмĕшле вĕрентỹ тытăмне лайăхлатассине халалланă ларăвне ирттернĕ. Унта ЧР Пуçлăхĕ Михаил Игнатьев та хутшăннă. Владимир Путин пухăннисене Раççей шкулне тĕнчере чи лайăххисенчен пĕри тума чĕнсе каланă. "Технологисем вăйлă аталанаççĕ, шкулăн та çакăнтан юлмалла мар. Çавăнпа вĕрентĕве çĕнетсе пымалли ăнăçлă механизм кирлĕ. Çав вăхăтрах çитĕнекен ăрăвăн Раççей халăхĕ-сен ăс-хакăлпа культура еткерне те манмалла мар", - тенĕ вăл. Ларура пурте усă курма пултаракан электрон шкулне, учи-тельсен професси ỹсĕмĕн тытăмне йĕркелессипе, педагогсен тĕрлĕ "хут ĕçĕн" калăпăшне чакарассипе, шкулсенче ачасене 2-3 сменăпа вĕрентессине пĕтерессипе çыхăннă ыйтусене тишкернĕ. Патшалăх Канашĕ сỹтсе явнă ыйтусем тĕлĕшпе комментари панă май ЧР Пуçлăхĕ Михаил Игнатьев çапла палăртнă: "Паян регионсен влаçĕсен умне вĕрентỹ тытăмне лайăхлатас енĕпе уçăмлă тĕллевсем лартнă. Пирĕн республикăра ку енĕпе пурнăçлакан ĕç курăмлă. Тĕп кăтартусенчен пĕри - пĕтĕм Раççей шайĕнчи олимпиадăсенче çĕнтернĕ ачасен шучĕ икĕ хута яхăн ỹсни". Михаил Васильевич çитĕнекен ăру валли аталанма кирлĕ условисем йĕркеленĕшĕн педагогсене, ачасене тав тунă. Вăл хăйĕн суйлав умĕнхи программинче 10 çулта Чăваш Енре 30 шкул тумалли тата модернизацилемелли тĕллев палăртни çинчен каланă: "Мĕнпур плана пурнăçлăпăр. Пирĕн ачасем çĕнĕ условисенче пĕлỹ илĕç, вĕсене икĕ сменăпа вĕрентнипе çыхăннă çивĕч ыйтăва та татса парăпăр". Чăваш Енĕн вĕрентỹ тытăмне федераци шайĕнчи ертỹçĕ-сем те пысăка хурса хакланă. РФ вĕренỹ министрĕ Дмитрий Ливанов палăртнă тăрăх - "Чăваш Республикин вĕрентỹ тытăмĕ нумай кăтартупа Раççей Федерацийĕнчи лидерсен шутĕнче. Эпĕ Чăваш Республикин вĕрентỹ тытăмĕ малашне те ăнăçлă аталанасси пирки иккĕленместĕп". Çав вăхăтрах министр республикăра пурăнакан мĕнпур çынна, уйрăмах вĕрентỹ тытăмĕн ĕçченĕсене, Çĕнĕ çул ячĕпе саламланă. Н.ВАСИЛЬЕВ.
Источник: "Пирěн пурнăç"