13 января 2016 г.
Январь уйăхĕнчи канмалли кунсенче Раççей Президенчĕ Владимир Путин Сочири "Кăнтăр Спорт" федераци базинче пулнă, çĕршыври дзюдоистсен пĕрлештернĕ командипе тренировка ирттернĕ. Командăра пĕтĕмпе - 28 субъектри 477 спортсмен (тĕп йыш 110 çынтан тăрать: 56 арçын тата 54 хĕрарăм). Раççейĕн пĕрлештернĕ команди йышĕнче пирĕн ентеш, Тихăнушкăнчен тухнă спорт мастерĕ Ирина Долгова та (манăн тăванăн хĕрĕ), пур. Вăл Иркутск облаçĕнчи Братск хулинче пурăнать.
Раççей Президенчĕ спортсменсемпе тĕл пулнă май вĕсенче пысăк шанчăк курнине палăртнă. Пĕрлехи тренировкăсенчен Владимир Путиншăн уйрăмах Ирина Долгова дзюдоисткăпа кĕрешни асра юлнă. 20 çулхи спортсменка Президента çурăм çине çавăрса хума пултарнă. "Вăл мана çатăрласа тытрĕ. Пирĕн ун пек пурте тума пĕлеççĕ. Кăтартушăн кĕрешес тесен çапла тумалла та", - тенĕ Президент.
Ирина тунă çитĕнỹсем чăннипех пысăк шанчăк çуратаççĕ. Вăл 2013 çулта Люблянта пулнă Тĕнче тата Сараевăра иртнĕ Европа первенствисенче ылтăн медальсем çĕнсе илнĕ. 2014 çулта Самсунри дзюдо енĕпе Гран-при ăмăртăвĕнче пĕрремĕш вырăна тухнă, Европа ăмăртăвĕнче кĕмĕл медале тивĕçнĕ. 2015 çулхи октябрь уйăхĕн пуçламăшĕнче халăхсем хушшинчи турнирта бронза çĕнсе илнĕ, çак уйăхрах "Пысăк шлем" тĕнче серийĕн турнирĕн тăваттăмĕш тапхăрĕнче ылтăн медале тивĕçнĕ. Хальхи вăхăтра дзюдоистка Раççейĕн пĕрлештернĕ командипе Парижра иртекен ăмăртусене хутшăнать. Иринăна малашлăхра тата пысăк пĕлтерĕшлĕ ăмăртусем кĕтеççĕ, вăл кăçал Рио-де-Жанейрора иртекен Олимп вăййисене хутшăнма тивĕçлĕ тĕп претендентка шутланать.
Николай ИВАНЕЙКИН.
Источник: "Пирěн пурнăç"