15 января 2016 г.
Нумаях пулмасть редакцине Иккĕмĕш Хурашашра пурăнакан Зоя Матвеева килсе кайрĕ. Зоя Ильинична - иртнĕ çул район хаçатĕнче ирттернĕ "Манăн тăвансем - Аслă Отечественнăй вăрçă çулĕсенче" фотоконкурсра çĕнтернисенчен пĕри. Алина Оринова тĕп редактор ăна Тав сăмахĕ тата асăнмалăх парне парса саламларĕ. "Фотоконкурса ярса панă сăнỹкерчĕкре - хуняман аккăшĕ Наталья Егоровна Матвеева, вăл вăрçăра связист пулнă. Ватăлсан та эпĕ ăна чылай пăхрăм", - çапларах каласа пачĕ Зоя Ильинична килти архивра упранакан сăнỹкерчĕк пирки. Паянхи кун Зойăпа Анатолий Матвеевсем - тивĕçлĕ канура. Вĕсен икĕ ача, виçĕ мăнук. Зоя Ильинична хăй вăхăтĕнче тăван хуçалăхра кормовозра ĕçленĕ, лашапа выльăхсем валли апат турттарнă. Мăшăрĕ трактористра вăй хунă. Ялта пурăнаканскерсем, Матвеевсем ыттисем пекех выльăх-чĕр-лĕх усраççĕ. "Хĕллехи вăрăм каçсене тутăр, чăлха-нуски таврашĕ çыхса кĕскететĕп, - тет Зоя Ильинична. - Район хаçатне те юратсах вулатпăр. Унта пире валли тĕрлĕ сĕнỹ-канаш нумай. Вулакансем валли конкурссем ирттернине те хапăл тусах йышăнатпăр". Эпир те, хаçат ĕçченĕсем, хамăр енчен пирĕн вулакансен кăмăлне тивĕçтерес тесе ĕçлеме шантаратпăр. А.КАРПОВА.
Источник: "Пирěн пурнăç"